Ong ka Congress : Ka CAA ka dei ka politics ka BJP ban phiah ia ki briew halor ka niam

Shillong, Lber 13 : U Nongialam ka Congress Legislative Party (CLP) Bah Ronnie V Lyngdoh ha ka sngi Balang ula niew ia ka Citizenship (Amendment) Act (CAA) kum ka politics pohdor jong ka BJP ban phiah ia ki briew na ka jingngeit niam, shuwa ka jingwan ka elekshon Lok Sabha.

“Phi shu peit ia ka CAA, ka dei ka politics pohdor jong ka BJP. Shuwa jong ka elekshon, kila wanrah ia kane ka ishu tang ban phiah ia ki briew halor ka jingngeit niam, ia kaba ngi pynrem jur bha, kaba ngi pyrshah bad ngi kyrpad ia ki nong India, ki paidbah ka Jylla ba kin ai ia ki vote sha ka party kaba burom ia baroh ki niam, ki briew kiban iada ia ka riti synshar ka ri, ki briew ki ban pynneh ia ka riti synshar paidbah” ong u Bah Ronnie.

Ha ka sngi Ba-ar, u Myntri Rangbah ka Jylla Conrad K Sangma ula ong ba ka CAA kan ym don jingktah ia ka Jylla Meghalaya namar la pyllait ia ki jaka Sixth Schedule na ka jingtreikam jong ka ain.

Haba kynthoh ia kane, u Bah Ronnie ula ong “Ngin kham sngew shngain lada kane ka long shibynta jong ka CAA rules. Tang da ki jingkren, ngam sngew ba ngi la thikna ba kan ym treikam. To ngin sa ia peit ia ka rule ba kila shna la kila pyllait ne em ia ka Sixth Schedule bad ngin sa ngeit ia kane”.