Shillong, Lber 12 : Ka Harijan Panchayat Committee (HPC) ha ka sngi Ba-ar, kala kyntu ia u Myntri kam Pohiing ka Ri Amit Shah ba un phah tohkit halor ka jingpynbthei bomb IED ha ka miet sngi Saitjain ha Them Iew Mawlong.
Ka HPC kala kyntu ruh ia u Myntri ba un tuklar ha kaban pynbeit noh ia ka kam ba iadei bad ka Them Metor da ki lai liang mamla.
“Ngi kyrpad ban tuklar noh mardor ha kaban shong bishar ia ka kam jong ka Them Metor da ki lai liang mamla bad ka Sorkar Meghalaya” ong u Gurjit Singh, Secretary ka HPC ha ka shithi bala phah sha u Amit Shah.
Ula ong b aka kam ba iadei bad ka hok bad jingbuhai shnong jong ki Jaidbynriew jong ngi ka dang don hapdeng ka jingbi shar ka Iingkasahri, ha kaba ka Sorkar Meghalaya, HPC bad kiwei kiwei ki Kynhun kila pyrshang ban wad ia ki lynti ba iabeit lang.
“Wat hapdeng bun ki jingialang bad jingkren, ka jingiaid ka kam kami poi shano shano ruh. Wat ka jingkular ban tular da ka Sorkar India ka dang iai sahteng haduh mynta. Ngi ngeit skhem ba lad aka Sorkar Pdeng ka shim ia ki sienjam ban pynbeit ia kane ka kam, kan dei ka kam kaba suk bha” ong u Singh.
Haba pynpaw ba ka jingpynbthei bomb ba dang shen ka dei ka jingpyrshang ban pynkut ia ka jigniakren pynbeit da ka lynti kaba jai jai, une u Secretary ka HPC ula ong “Kane ka jingjia kam dei kaba shu jia ryngkat hynrei ka dei ka dak jong ka jingbym bym shngain kiwei pat ki jaidbynriew bar it paid hapoh ka Jylla Meghalaya. Ka jingkem briew ha kane ka jingjia ka pynpaw ia ka kam jong ki briew kiba pyrshang ban bsut ia ka jingtieng jingsmiej bad ka jingpyrshang ban pynsngap jar ia ki nongshongshnong ka Them Metor”.
“Ngi pyntip sha phi da ka jingsngewkhia bay m don mano mano ruh na ka Sorkar Meghalaya-na u Myntri Rangbah bad kiwei kiwei, kiban pynrem ia kane ka jingjia haduh mynta. Ki nongialam sain pyrthei, kiba ju smat pynmih khubor pyrshah ia ki nongshongshnong ka Them Metor man ka por, ki khlem pynmih wat shi kyntien ne wan iuhkjat ha ka thain ban pynpaw ia ka jingsngewkhia halor ka jingpynbthei bomb lane kyrshan ia ki nongshongshnong” ula ong.
Kat kum ka jingong jong u, ka Sorkar Pdeng ka dei ban shim ia ka kamram ha kaban bat ia ka ain bad iada ia ka hok bad jingshngain jong baroh ki nongshongshnong, kam pher ki dei na kino kino ki jaidbynriew.
