Shillong, March 08: Ka tnat Social Welfare ka Sorkar Jylla haka jingiatreilang bad ka State Hub for Empowerment of Women bad ka Meghalaya State Rural Livelihoods Society, hynne ka sngi Thohdieng kala rakhe iaka International Women’s ha State Convention Centre, Shillong.
Ha kane ka sngi, ka tnat Social Welfare kala pynkup burom iaki kynthei kiba paw ha kiba bun ki kam, kiba sam lem ia ki lynti ba ki shim bad ki jingpynkupbor ia ki Kynthei.
Haba kren ha kane ka sngi, ka Myntri Sorkar ka Kong Ampareen Lyngdoh kala ong mynta ka sngi kadei ka sngi ban lehkmen namar ngi lah don ha ka por ba kum ki kynthei, ngi la ioh ka jingithuh kiba ngi dei ban ioh. Ki kynthei mynta ki don bynta lang ban thaw iaki Polisi la kadei hapoh ka Jylla ne shabar Ri namar mynta ka lah dei ka hok ki kynthei.
Ka Kong Ampareen kala kular ba ka Sorkar kan pynthikna ba ki kynthei kin don bynta ha ki Empowerment Program ba bun jait jong ka Sorkar ban kyntiew iaka ioh ka kot ki kynthei.
“Ngi ngeit ba lada pynkhlain iaka ioh ka kot bad kum ki longkmie ngin lah ban pynkhlain iaka ing ka sem bad lyngba ka State Rural Livelihood Society, ka Sorkar kala mang bun ka song pisa ban pyntreikam haki bun jait ki Program kiba don bynta bad ka bha ka miat ki kynthei” kala ong.
Ka Kong Ampareen kala ong “Ka Sorkar kan pynlut 18% naka 5 hajar klur tam naka bynta ban kyntiew iaka koit ka khiah ki kynthei bad kala pyntip ruh ba ka Jylla Meghalaya ka don ruh ki SHG ba khlieh daki kynthei ban kyntiew ia ka ioh ka kot.
Ha kane ka sngi nalor ka Kong Ampareen Lyngdoh, la don lang ruh ka MLA ka Kong Santa Mary Shylla bad u Pravin Bakshi u Commissioner & Secretary ka tnat Social Welfare Department nalor kiwei kiwei.
Ha kane ka sngi la pynkup burom iaka Nambi Jessica Marak (culinary), ka Kong Kmoin Wahlang bad Bonifilia Shullai (sports), ka Kong Sidalin Marbaniang (innovation), ka Ratna Rai bad ka Kong Pdiangsngewbha Pohti (SHG).
Nalor ka jingpynkupburom, la sam ruh daki kor suh jain shaka Superintendent of Training for Women in Need of Care & Protection jong ka tnat Social Welfare.
