Shillong, Lber 06 : U Myntri Rangbah ka Jylla Conrad K Sangma ha ka sngi Balang, ula kular ba ka Sorkar Jylla kala shim ia ki sienjam ban pynthikna ba ki kam dawa pisa jubor jong ka seng Hynniewtrep National Liberation Council (HNLC) kin kut noh hapoh ka Jylla.
“Ngi la trei shaid shaid bad ngin pynthikna ba kine ki kam (dawa pisa) kin kut lut ploin bad yn ym don napdeng ki nongshongshnong jong ngi ki ban shah ktah na kane” ong u Conrad haba iakren bad ki nongthoh khubor.
Kane ka jingkynthoh jong u kala mih halor ka jingkiew ka jingsam shithi dawa pisa sha ki Hehspah bad Nongkhaii bad kumjuh ruh ka jingiohkem ia u PSO ka HNLC Storgy Lyngdoh na Shillong.
U Conrad ula ong ba ka Sorkar jong u, kala kren da kaba shai kdar ba kan ym ailad ia kino kino ki kam beain ba kum kane (dawa pisa).
“Kumta, haba kane ka mih kala wan sha ka jingtip jong ngi, ngi la shong ia ka jingialang ha ki taiew bala leit- Ngan ym batai lut namar ka dei ka jingialang hapoh Iing-bad ngi la bthah ia ki Pulit ba kin shim ia ki sienjam bad leh ia kaei kaba donkam ban pynthikna ba kum kine ki kam kim dei ban jia” ula ong.
“Dei halor kane, ki Pulit kila leh iala ka kamram. Kila jam shakhmat bad phin sa iohi ba ki kam dawa pisa kiba ju don ha ki snem bala leit noh, kin sa duna bha bad wat ki briew ruh kin sa iathuh ha phi. Hooid, ki don shibun ki kam ba hap leh bad ka jingtrei kala iaid shaid shaid” ula bynrap.
Hato kane ka kam dawa pisa ka pynpaw ba ka HNLC kam don jingmut hok ia ka jingiakren iasuk, u Myntri Rangbah ula ong “Khlem pep, ngi la kren da kaba shai sha ka HNLC ha kiba bun ki jingiakren lyngba u ksiang jong ngi ba lada ki mut hok shisha iaka jingiakren, baroh kine ki kam (dawa pisa) ki dei ban sangeh noh”.
Haba phai pat sha ka jingpyrshang thaw kynhun biang ia ka GNLA ha Garo Hills, u Myntri Rangbah ula ong ba lai ngut ki briew kila shah kem bad ki Pulit ki dang wad mynta sa ia lai ngut, ia kaba la thikna ba kin sa ioh kem ia ki.
Nalor kane, u Myntri Rangbah ula kam ba ka jinglong jingman ka suk ka sain hapoh ka Jylla ka long kaba jai jai bha.
“Ki jingjia hangne hangtai kin don beit ym lah len ia kata hynrei ngi la lah pat ban tehlakam ia ka shongsuk shongsain” ula ong.
