Shillong, Lber 05: U Superintendent of Police (SP) CID Meghalaya u Bah Vivek Syiem u la pyntip ba ki paidbah ki dei ban pyntip shaka Cyber Crime Wing daka ba phone ha u Nomber 1930, lada ki shah thok pisa lyngba ki kor Internet (Cyber Crime).
Haba kren sha ki lad pathai khubor u Bah Vivek u u la pyntip ba ka Jylla kala sakhi ka jingkiew ki kam shah thok pisa lyngba ki kor internet (Cyber Fraud) ha baroh ki District ka Jylla.
U Bah Vivek u la iathuh ba ka tnat CID kala dep ban phah jingtip sha baroh ki Superintendent of Police (SP) jong ki District bad kumjuh ruh shaki paidbah hynrei la sakhi ba ki dang don ki riew paidbah kiba shah pynngop haki riew thok pisa lyngba ki kor Internet.
“Nga kwah ban pyntip paidbah ba ka don ka Indian Cybercrime Coordination Centre (I4C) bad lyngba kane, ki paidbah kidei ban ujor daka ba phone ha u Emergency Number 1930 lada ki shah thok pisa lyngba ka kor Internet” la ong u Bah Vivek.
U Bah Vivek u la pyntip ba ka jingdon ka I4C ka iarap iaki paidbah ban ujor pyrshah ia kino kino ki kam beain lyngba ki kor Internet bad lada ki paidbah kim nang ban ujor, ki dei ban phone ha u Nomber 1930 bad ki briew kiba trei ha u Emergency Number 1930 kin batai kumno ban ujor.
U la ong ba naka liang ka tnat Cyber Crime Wing ka ialeh katba lah ban pynkhlain shuh shuh iaka tnat khnang ban tehlakam iaki kam beain bad ban kem ia kito kiba donkti ban thok pisa iaki paidbah.
