Nongstoin, Lber 04 : Ki riew runar kila pyniap dusmon ia uwei u nongniah tourist taxi ha Nongstoin, West Khasi Hills hynne ka miet shiteng synnia.
Kane ka jingjia kala jia ha ka por kumba 12:15 baje eiei ha Kynroh Taxi Stand, ong ki Pulit kiba pyntip ba une u nongniah kali tourist ba kamai Nongstoin-Shillong, u dei uba tip kyrteng u Macborn Bonnyson Kharbani uba shong ba sah ha Upper New Nongstoin.
Ki bahaiing hasem haba iakren bad ki nongthoh khubor kila iathuh ba ha kane ka miet, u Macborn u dang shu dep pynhiar lut ia ki briew kiba wan na Shillong bad thmu ban wanphai noh shala iing hynrei haba poi ha steshon, saw ngut ki briew kila ker kut ia u bad kila kynroi ryngkat ka tim sih tim sang.
Ki iathuh ba ha katei ka por, uwei u briew uba dung da ka wait na ki bynta jong ka shadem jong u Macborn haduh ba ula kyllon beit khrup ha madan.
Ki iathuh ba haba ioh jingtip ia kane ka jingjia, kila mareh wut wut sha kane ka steshon bad kila pynkit noh mar mar ia u sha Nongstoin Civil Hospital hynrei ynda poi ha kane ka jaka sumar, ki doktor kila pyntip ba une u samla ula khlad.
Ki bahaiing hasem kila leit ban ujor ia ka ejahar halor kane ka jingjia bad ki Pulit kila pynlong ia ka jingkhynra kaba jur ha ka thain bad kila iohkem ia uwei u briew ba suba donkti uba la tip kyrteng u Medius Mawlot na ka shnong Mawkaton.
Ki Pulit ki iathuh ba u Medius ula phla ba u dei uba dung ia u Macborn. Ka jingtohkit mynta ia kane ka jingjia kala iaid shakhmat ban lapdien sa ia kiwei pat kiba donkti lang.
