Shillong Lber 02: Ka Kyrtong jong ka seng NPP kaban iakhun ia ka elekshon MP na Shillong Parliamentary Constituency ka Kong Amapareen Lyngdoh kaba dei ruh ka Myntri Sorkar, hynne ka sngi Thohdieng, kala ong ba kam don kano kano ka jingkynthoh pyrshah ia u Conrad K Sangma uba ialam ia ka sorkar Meghalaya Democratic Alliance hashwa jong ka Elekshon Lok Sabha.
“Phi dang shu dep peit ia ka jingwanrah ia ka Mang Tyngka da u Myntri Rangbah ka jylla bad ngam tharai ba kan don kano kano ka jingkynthoh pyrshah ia ki kam kiba trei da ka sorkar. Ngam tharai, nga don ia ki jingtynjuh hynrei haba nga leit ha kylleng ki jaka ka don ka jingkiew shaphrang bad ka roi ka par. Haba nga don ha Rambrai ha ki 7 bnai kiba la dep, ki surok ha katei ka jaka ki long kiba sniew bha hynrei haba nga leit mynne ne mynhynin ki surok ki long kiba biang bha” ong ka Kong Ampareen haba iakren bad ki nongthoh khubor.
“Peit ia ki nongrep kila leh bha mynta bad ia kaei kaba ki leh mynshwa. Peit ia ka jingkamai bad ia ki prokram kiba iadei bad ka jingkyntiew ia ka kamai kajih ha ka kam rep kam riang. Kine baroh ki pyni shai bad ngi la kiew shaphrang, haei kan don kata ka jingkynthoh pyrshah ia ki kam kiba trei da ka sorkar jylla bad ngam iohi eiei ba kan don ka jingkynthoh pyrshah ia ka sorkar” kala ong.
Kala ong ba ki paralok ha ka sorkar MDA ki pynieng ia ki kyrtong ki jongki na ka bynta ka elekshon Lok Sabha.
“Ngi ia don lang ha kajuh ka sorkar. Naei kan mih kata ka jingkynthoh ne jingkynnoh pyrshah ia ki kam kiba la leh da ka sorkar? La buh dak jingkylli ka Kong Ampareen.
Ka Myntri Sorkar kala kam ba ka jylla hapoh ka jingialam jong ka NPP ia ka Sorkar kala leh bha ha ka liang ka koit ka khiah, ka pule puthi, kam jngohkai bad ha kiwei kiwei ki liang.
“Phi lah iohsngew ia ka jingwanrah ia ka Mang Tyngka da u Myntri Rangbah.Hato phim ngeit ba ka don ka jingthaw ia ki kam ki jam kaba la jia? Ki tnad bapher bapher kila pyndep ryntih ia la ka kamram ha kaba iadei bad ki nongaplai” ong ka Kong Ampareen.
Kala ong, ba kan ym pynleit jingmut than ia kaei kaba ki don ha ka liang pyrshah ki kren, namar kan pynpulom noh ia ka jingthmu ka jongka ban iakhun ia ka elekshon, namar ba ka iohi shai kdar bad ka mihkhmat ia ka seng kaba ialam ia ka sorkar synroplang.
“Kiba bun ki kyrtong kin dei ki paralok jong ngi, kumta naei kan mih kata ka jingylli ba kan don ka jingiapher ka rukom sngew ha kaba iadei bad ka jingkiew jong ka jylla? Kin don ki katto katne kiban hylla bad ym shim la leh eiei, hynrei ngi la pynshai ia ki jingkynnoh ki jongki, da kaba pyni shai kdar ia ki rai, ki nombar bad ki jingkdew, kumta kan shong ha ki paidbah ka Meghalaya ban shim ia ka rai” ong ka Kyrtong ka NPP.
“Lada phi kwah MP kaban pynsngew ia ka sur jong u paidbah ka jylla, ki bun ki ishu jong ka jylla la iakhun ha ki surok hynrei kitei ki ishu ki donkam ban shim rai da ka sorkar pdeng. Haduh katno phi la iohsngew ban don ka jingiatai nia halor kitei ki ishu kiba la kylla long ki jingeh kiba khraw ha ki surok na ki snem sha ki snem. Ngam tharai ba ngin iohsngew, kumta nga leit sha ki paidbah da ka jingthmu kaba shai kdar, nga don hangne ban pynsngew ia kitei ki ishu ha ka jaka kaba dei” kala ong.
Ka Kong Ampareen kala ong, ruh ba ka don ia ka jingmut kaba skhem ba kan iakhun beit ia ka elekshon MP.
“Nga tip bha ia ka jingduhnong bad jingiohnong ha kaba iadei bad ka resol na ka jingiakhun ia ka elekshon. Ka mat ka jong nga ka long kaba shisur shidur ba ngan iehnoh ia ka shuki ka jong nga, na ka bynta kawei pat kam kaba nga don ha ka jingmut jingpyrkhat ka jong nga. Nga sngew ba nga la long kaba kloi, ban leit sha Parliament” ong ka Kong Ampareen.
“Hato ka shuki Myntri ka long kaba kongsan palat ia nga, ba ngan leh kiar noh ia ki jingdonkam jong ka jylla kaba don hapdeng ki kynrum kynram, haba phi la iohi ia kiei kiei baroh, ka jingsheptieng kaba ki paidbah ki don, ki khana kiba la pynsaphriang ha ki social media, ka jingsngew ba ngim don ia ka jingsngew shngain- kine baroh kidei kiba shisha. Ka UCC kadei kaba shisha. Ka CAA kadei kaba shisha, ka jingiada ia baroh ki niam kadei kaba shisha, ka jingiakynad ha khappud kadei kaba shisha, ka khaii pateng kadei kaba shisha, kine baroh kidei ki mat kiba shisha. Lada ki paidbah ki sngew ba nga, ngan dei kata kawei ka briew, nga kloi ban iakhun na ka bynta jongki bad kumta baroh kiei kiei kiba don ha kane ka por kaba mynta ha nga, kin long ki bym donkam” ong ka Kong Ampareen.
