Shillong Lber 01: Ka Myntri ka Sorkar Pdeng kaba khmih ia ka Tnat Pla Tyngka, ka Nirmala Sitharaman, kala plie ia ka Electronic Data Interchange (EDI) ha ki Land Customs Stations (LCS) jong ka thaiñ shatei lammihngi, lyngba ka kor Internet na New Delhi hynne ka sngi Thohdieng.
Lyngba kine ki LCS kiba don EDI, ka jingpynkit ia ki mar bad ka jingioh jingbit na ka Custom mynta kan long kaba kham suk, kumta kane ka kyntiew ia ki kam khaii pateng bad ka ioh ka kot ha ka thaiñ.
Ka Sitharaman kala kyntu ia ka CBIC bad Customs ban weng ia ki jingeh kiba iadei bad ki jingshalan bad kala ong ba ka jingpynbiang EDI ha ki LCS ka long kaba donkam namar kan iarap ha ka jingpynbiang jingtip mardor shaphang ka jingkit ia ki mar ki mata.
Ka Myntri Pla Tyngka, kala kyntu ruh ia ka Tnat Customs ban long kaba peitngor haba pyntreikam ha kine ki jaka kiba don ha ki jaka khappud, khamtam ha ki jaka ba kham bun briew bad kiba kham don jingma.
Katba u Revenue Secretary, Tnad Pla Tyngka jong ka sorkar pdeng u Sanjay Malhotra, ula ong, “Ka thong jong u Myntri Rangbah duh u Narendra Modi ban pynlong ia ka ri India kaba kiew shaphrang hashuwa u snem 2047 ka kynthup ka jingwanrah ia ki jingdon jingem ha ki kam Digital kiba katkum ka juk mynta bad ka jingpyndonkam ia ka teknoloji ban pynthikna ba ki jingmyntoi jong ka jingkylla ha ki kam digital ka poi sha baroh ki briew. Ka jingpynbiang ia ki Electronic Data Interchange (EDI) ha ki Custom Station ka long kawei ka sienjam ha kane ka bynta ban pynsuk ia ki kam khajna bad ki kam Custom ha kaba yn donkam ban leit mihkhmat hi dalade”.
Ula ong ba ka long kaba ioh mynsiem ban tip ba lyngba kane ka prokram, ka CBIC ka la wanrah ka jingphai khmat kaba kongsan ha kaba iadei bad ka roi ka par jong ka thain shatei lammihngi da kaba pynbiang EDI ha ki Land Custom Station ha kine ki bynta ba kyndong tam jong ka thain shatei lammihngi.
Na ka liang jong u Chairman ka Central Board of Indirect Taxes and Customs (CBIC) Sanjay Kumar Agarwal ula ong ba ki don 44 tylli ki LCS ha ka thain shatei lammihngi kiba kynthup 7 tylli ki Jylla – ka Assam, Meghalaya, Tripura, Mizoram, Manipur, Arunachal Pradesh bad Sikkim.
Ula ong ba ka jingwanrah ia ki jingdon jingem bad ka jingpyniaid ‘Automatic’ ia ki kam Custom ha ki LCS ki la long ka bynta ba kongsan jong ka tnad Customs jong ka ri.
Ha kane ka jingplie ia ka EDI la iadonlang ki heh ophisar jong ka CBIC bad Tnad Revenue, Tnad Kam Pla Tyngka jong ka sorkar pdeng bad kiwei kiwei.
 ha ki Land Customs Stations (LCS) jong ka thaiñ shatei lammihngi, lyngba ka kor Internet na New Delhi hynne ka sngi Thohdieng.){kind=link}