Shillong, Rymphang 29: U Deputy Commissioner ka Ri Bhoi District, Arpit Upadhyaya ula hukum ia ki nongri masi jong ka shnong Mawsmai, Ri-Bhoi, ba ki dei ban pynkhuid mardor ia ki jakhlia masi bala shu bret pathar kat shaba lap ba shem hapoh ka 15 sngi.
Une u Khliehduh ka District ula bthah ruh ia ki Pulit ka Khanapara Police Station ba kin khot hajir ia baroh ki briew ba ri masi ha kane ka Shnong, ban pynthikna ba ki dei ban pynkhuid ia ki jakhlia masi bala shu bret ha ki nala shnong kaba tuid sha ka surok bah National Highway.
Lah ban kdew hangne, u Deputy Commissioner lem bad ki Ophisar ka District, dang ha ka 13 tarik Rymphang, kila leit jurip ia katei ka shnong halor ka jingujor jong ka Food Corporation of India, ia ka jingwan sieng ka jingsma iwtung eit masi sha ka kudam jong ka Corporation, kaba don ha kane ka Shnong.
Ha kane ka jingjurip, une u Khliehduh ka District ula lap ba ki nongri masi kila shu pyntuid satah ia ki jakhlia ba mih na ki sem masi sha ki nala kiba tuid pat sha ka surok Bah, kaba wanrah pat ia ka jingsma iwtung kylleng ki jaka bad buh jingma ia ka koit ka khiah ki riew paidbah.
Halor kane ka jingshem, u Deputy Commissioner ula pynmih ia ka hukum ba bthah ia ki nongri masi ba ki dei ban pynkhuid noh mardor ia ki jakhlia baroh hapoh ka 15 tarik nalor ban sangeh noh ia ka jingbret pathar ia ki jakhlia ba mih na ki sem masi lem kumta kin ngat ha ki jingpynsajia kat kum ki kyndon ain.
