Tinsukia, Rymphang 29 : Ki Pulit ka Tinsukia kila kem ia lai ngut ki nongialam jong ka seng samla pule na Tinsukia, Upper Assam namar ka jingpynlong ia ka jingiakhih ka Tinsukia ba dawa pynsangeh treikam ia ka Citizenship Amendment Act (CAA).
Kine ki lai ngut ki nongialam sengbhalang ki kyrteng u general secretary ka Raijor Dal, Zahiuddin Laskar, u Secreatry ka Chhatra Mukti Sangram Samiti Umananda Moran bad Secretary ka Dhubri district Krishak Mukti Ratul Roy.
Hadien ba ka Sorkar Pdeng kala pynbna ban pyntreikam noh ia ka CAA shuwa ka elekshon Lok Sabha, ka Krishak Mukti Sangram Samiti bad ka Nari Mukti Sangram Samiti, Tinsukia district committee kila pynlong ia ka jingiakhih ha Tinsukia Thana Charali ba dawa pyndam noh ia ka CAA.
Haba sdang une u bnai, u Myntri kam Pohiing Amit Shah ula ong ba ia ka CAA kaba la pynlong ain ha u snem 2019, yn sa pyntreikam noh shuwa ka elekshon Lok Sabha mynta u snem hadien bala dep pynmih ia ki rules.
Ka Parliament kala pynlong ain ia ka CAA ha ka 11 tarik Nohprah 2019 hadien ka jingiatai kaba jur bad ka jingiakhih ha kylleng ki Jylla ka ri India.
Ka CAA ka dei ka ain ba pynkylla na ka Citizenship Act u snem 1955 kaba ailad ban khein nongshongshnong ka Ri India ia ki poi wir na Afghanistan, Bangladesh bad Pakistan kiba dei naka Niam Hindu, Sikh, Jain, Parsi, Buddhist bad Khristan, kiba rung sha India ha ne shuwa ka 31 tarik Nohprah 2014, namar ka jingshah thombor ha kitei ki ri.
