Nongstoin, Rymphang 25 : Ka jingiap jong ki syiar Khasi (local chicken) kala jur biang mynta ha kylleng ki thain ka West Khasi Hills, na ka jingwan lynshop jong ka khlam kaba la sdang naduh ka taiew ba nyngkong jong u bnai Rymphang.
Ia kane la pyntip da ki nongri syiar Khasi na ka shnong Mawiawet, kiba pyntip ba ka jingiap jong ki syiar Khasi ka la jia jan manla ka sngi ha man ki thliew Iing ba ri syiar ba kynthup naduh ki syiar heh haduh ki khun syiar.
Ka kong P Syiem na Mawiawet haba iakren bad Ka Shlem, ka pyntip baka jingiap jong ki syiar ba ka ri kala sdang naduh ka taiew ba nyngkong jong u Rymphang. Kane ka longkmie kala pyntip ba ki syiar ba ka ri, kiba don palat spah tylli, kila iap lut na ka jingpang kaba suba dei ka khlam.
“Ka kam ri syiar kala ai kamai bha ia nga bad ha ka sngi snem, nga ju kamai palat phew hajar tyngka da kaba die syiar hynrei mynta u snem, baroh ki syiar kila iap lut na ka jinglynshop ka khlam” kala ong.
Kane ka Longkmie ka pyntip ba kane ka jingiap ki syiar kala sdang nyngkong ne ki iing kiba marjan. Ka ong ba ka jingpang kala wan pur sha ki syiar ba ka ri bad kala pyrshang ruh ban ai dawai hynrei ki dawai kim shym la iarap satia haduh ba iwei I khun syiar ruh im sah shuh.
Ka pyntip ba ki don hynriew tylli ki Iing jong ki paramarjan kiba ri da ki spah tylli ki syiar hynrei kine ki iing ruh kila duh lut ia baroh ki syiar na ka jinglynshop ka jingpang.
