Guwahati, Nailar 03: Ha ka jingjia ka ba la pynkyndit ia ki ba bun balang, laingut ki khynnah rit la iathuh ba la ioh ban pyllait im na uwei u diengbah na ka jaka khlaw ba rben ka ba don ha ki bynta jong ka Dhemaji district ka Assam.
Ka khubor ka la ong namar ka jingdon jong uwei u hati khlaw ka la pynbor ia kine ki khynnah rit ba kin hap ban pynlut ia ka miet halor jong uwei u dieng ha ka jaka khlaw ba rben.
Katkum ki khubor, la ong ba kane ka jingjia ka la wan jia hadien ba kine ki khynnah rit ki la leit sha katei ka khlaw ban wad ia la ki jingri ki jong ki, ki ba la jah rngai. Hynrei, kynsan uwei u hati khlaw u la wan mihpaw bad beh thong ia ki ha kane ka jaka khlaw.
Kumta hapdeng ka jingtieng hadien ba ki la iohi ia une u hati u ba heh kine ki laingut mardor ki la phet krad na katei ka jaka bad shongrieh halor jong uwei u diengbah. Kaei ka ba la kham pyntieng pynsyier ia ki ka long namar une u hati u la ieng beit ha trai jong une u dieng u ba ki shongrieh ka ba la pynlong ia kine ki laingut ba kin hap ban pynlut ia ka miet halor jong une u dieng.
Kham hashwa, uwei u khynnah samla u la mynsaw jur hadien ka jingshah thombor ha uwei u hati khlaw ha ki bynta jong ka Amching ka ba la jia ha ka jan miet jong ka 23 tarik u bnai ba la dep. Ia une u samla bym lah ban tip kyrteng la pynkit noh mardor shapoh Gauhati Medical College & Hospital (GMCH) da ka jingiarap jong ki nongshong shnong.
Katto katne na ki nongshong shnong ki la ioh ban ring video halor kane ka jingjia lyngba ki mobile phone bad kane ka video ka la saphriang sted bha lyngba ki social media.
Na ka liang u Deputy Commissioner of Police (Central) of Guwahati, u Diganta Kumar Choudhury ruh u la pynthikna halor kane ka jingjia bad ong ba na ka liang ki dkhot jong ka tnat Forest ki la pyntip sha ki bor pulit halor kane ka jingjia.
