Shillong, Rymphang 22 : U Myntri Rangbah ka Jylla Conrad K Sangma ula pyntip ha Iingdorbar hynne ka sngi Palei ba ula kyrpad ia ka Sorkar Assam ba kan ai jaka ha kaban shna ia ka Meghalaya House ba thymmai ha Guwahati.
Ula pynbna ruh ia ka rai jong ka Sorkar Jylla ban buh ia ka Guest House ha Khanapara, Ri-Bhoi District.
Haba jubab ia ka jingkylli bynrap, u Myntri Rangbah ula ong “Ha ka jingialang ba dang shen jong nga bad u Myntri Rangbah ka Assam, nga la iakren ia kane ka kam ba ka Assam kan ai ia ka jaka ba kham biang. Nga la ioh ia ka jubab kaba sngewtynnad. Ngi la buddien mynta bad ngi kyrmen ba ngin ioh ia ka jaka naba ngi la sdang ia ka jingiakren”.
Ula pyntip ruh ba ka Tnad Tourism kala dep thied ia katto katne ki jaka ha khanapara bad la tyrwa ban buh ia ka Guest House, ka ban pyndonkam ha kiba bun ki kam.
“Ka Tnad Tourism kan sdang noh ia ki kam ba donkam ha kaban shna ia kane ka Guest House ha Khanapara” ong u Conrad.
Shuwa kane, u Nongialam ka Liang Pyrshah Ronnie V Lyngdoh ula kyntu ia ka Sorkar Jylla ba kan pyrkhat ha kaban pynbun ia ki kamra ha ki artylli ki Meghalaya House ha Guwahati bad Vellore ban weng ia ka jingeh jong ki samla pule bad ki nongshongshnong ka Jylla. Ula ong ba ka baiwai ka dei kaba rem bha bad lada ka Sorkar ka pynkha kamra shuh shuh, kan ym ktah satia ia ka pla tyngka jong ki paidbah ka Jylla.
U MLA ka VPP na Mawlai Bah Brighttstarwell Marbaning ula pan jingtip la ka Sorkar ka don jingthmu ne em ban wanrah ia ka jingtei kaba kham bha ha Guwahati bad Vellore haba iohi ia ka jinglong jingman jong kine ki Meghalaya House namar ka jingleit bha jong ki nongshongshnong ka Jylla ban leit phah sumar.
Halor kane, u Myntri ka GAD Rakkam A Sangma ula ong ba kane ka kam ka dang don hapoh ka jing bishar la ka dei jong ka Guwahati ne ka Vellore.
