Nongpoh, Rymphang 19 : Kawei ka trok 12 Taiar kaba hiar na ki thain Shillong By-pass kala leit rat ia artylli ki trok LPG hynne ka janmiet sngi Nyngkong hapoh ka surok NH-6 ha shnong Shangbangla bad ha kane ka jingjia, u nongniah jong ka trok 12 taiar ula mynsaw jur na ka jingiatakhuh kaba jam hapdeng kine ki kali.
Kane ka jingjia kala jia ha ka por 4:30 baje eiei bad la iathuh ba ka jingaksiden kala jia na ka daw ka jingbym lah tehlakam u nongniah ka trok 12 taiar ia ka kali haba poi ha kane ka khongdong jong ka shnong Shangbangla.
La ong ba kane ka trok 12 taiar ka dei kaba kit ia u clinker ban leit sha Guwahati.
Kine ki trok LPG kiba don ia u Registration No. As 01 DD 7762 bad AS 01 DD 7763 ki ba dang kiew na Guwahati ban wan sha Shillong.
Ha kane ka jingjia aksiden u Draibar u ba niah ïaka truck kit clinker la mynsaw jur bad la pynkit syndon ïa u sha jaka ai jingsumar katba ki Nongniah jong kitei ki artylli ki LPG truck ki khlem long eiei.
Lah ban kdew hangne, kane ka jaka ba aksiden ka dei ka jaka ba ju mihbha ki jingjia aksiden mala ka por khamtam ki kali heh namar ka jingkhongdong palat bad bun ruh ki kali kila thung baji sha riat man la ka por.
