Shillong, Rymphang 14: Ka Khasi Students’ Union Laban Circle hynne ka sngi Balang, kala ai por 15 sngi ia ki bor pyniaid District ka East Khasi Hills ba kin kyndang noh ia ki briew kiba sah beaiñ ha Maxwelton Estate, Rilbong, Shillong.
U President ka KSU Laban Circle samla Reuben Najiar bad General Secretary Samla Jason Laloo, kila leit ban aiti da ka dorkhas ha ka Deputy Commissioner ka East Khasi Hills haba byrngem ba lada ym leh eiei, ka KSU kan shim hi noh iala ka jong ka sienjam.
“Kane kan long ka jingiakynduh kaba khatduh ban ujor bad lada kim lah ban leh eiei hapoh 15 sngi, ka Seng kan shim hi, ia la ka jong ka sienjam. Ka Seng ka kwah ban iaid da ka lynti ba jai jai ryngkat ki kyndon aiñ hynrei lada ki bor pyniaid ki leh matlah, ka Seng kan hap ban shim hi ia ka aiñ ha la ka kti” la byrngem ki nongialam ka KSU Laban Circle.
Ka KSU kala pynpaw ba kane ka mat kala sahkut tang ha ka miej jingiakren naduh u snem 2022 bad kam shim la don kano kano ka jingpynbeit na ka liang ka Sorkar bad ka Ophis jong Deputy Commissioner, ban weng ia kine ki briew kiba sah beaiñ bad kat nang iaid ka por, kitei ki bar jylla kila nang jyllei bad nongroi shuh shuh ha katei ka jaka.
“Kine ki briew kiba sah be-aiñ ha kane ka jaka kaba hap hapoh ka jingkhmih ka Municipal, ki ri ia ki masi, ki pyntuid jaboh shapoh ki nala, ki wah bad kane ka ktah lut ia ka koit ka khiah jong ka shnong ka thaw” ong ka KSU.
“Ka Ain jong ka Municipal kam shah ban ri jingri hynrei ki bor pyniaid ki matlah bad kim shim la leh eiei halor kane ka bynta” kala bynrap.
Kine ki Nongialam ka KSU kila pyntip ba ka seng kala leit iakynduh man la ka por ia ki bor pyniaid jong ka Shillong Municipal Board bad ha ka 5 Tarik u Jylliew 2023, ka la ai da ka dorkhas bad maham tyngeh ba ka SMB kadei ban shimkhia.
Ki iathuh ba ka SMB kala mynjur ha katei ka por bad kala phah Notis sha kine ki briew hynrei kala shu kut noh tang ha ka jingdaiñ kuna hynrei ka jingiakren ka kylla noh ba ka SMB kam shim don ka bor ban pynmih ia kine ki briew bad ka seng ka suba jur ba ka don eiei sha lyndet ba ka SMB kala kylla ktien.
Ka KSU kala buh jingkylli “Kumno kine ki briew kiba sah be-aiñ, ki ioh ia ka bording elektrik, ka um khlem kano kano ka jingsiew bad na ka por sha ka por, la ju iohsngew ruh ba ia kine ki briew la bei pisa da ki kynhun shitniam jong ki Hindu bad kane ka jaka ka long ruh kum ka ktem drok, kam leh awria, ka tuh ka thiem bad ka buh ha ka jingma ia ki nongshong shnong baroh”.
“Kaba sngew thamula ka long ba kane ka jaka ka don marjan bad ka Assembly hynrei ki nongmihkhmat ka jylla ki long kiba matlah bad man ka por, ki leit sha Assembly hynrei kim shim lah ban peit bad khmih ia kane ka jaka” kala bynrap
Ka Seng ka kyntu ia baroh ki nongmihkhmat ka jylla, ba ha kane ka Assembly kaban wan, ba kin sangeh ban leit hiar bad peit bad khmih ia kane ka jaka ba kin lap ia ka jingjaboh, jingsma iwli kaba mih na kane ka jaka.
