Shillong, Rymphang 13: Ka kynhun ialehkai Cricket jongka Meghalaya kala ioh rung sha ka phainal jongka U-23 Men’s Col CK Nayudu Trophy plate group da kaba pynrem kput ia ka Mizoram ha ka semifinal kaba la long ha MCA Ground, Polo hynne ka sngi Nyngkong.
Ka Meghalaya kala pynrem iaka Mizoram da 107 run khlem da donkam shuh ban tied haka sien ka baar.
Ka Mizoram kala leit ban tied nyngkong bad kala kamai tang 33 run bad hap lut ki nongtied bad tang u C Vanlalhruaia ula kamai marwei 21 run katba 6 ngut ki nongtied kila ioh da ka ‘Duck’ ne khlem lah kamai tang shi run ruh.
U Nongkawang bol ka Meghalaya u Abhishek Kumar ula shim 6 wiket bad ai tang 4 run katba u PM Santhosh ula shim 4 wiket bad ai 29 run.
Haba ka Meghalaya kala leit ban tied kala kamai 230 run bad hap lut ki nongtied hynrei kala tam da 179 run ia ka Mizoram.
Ka Mizoram kala leit biang ban tied ha ka sien ka baar hynrei kala kamai tang 90 run bad hap lut ki nongtied bad kane kala pynlong iaka Meghalaya ban jop suk da 107 run.
U Abhishek Kumar ula ioh shim 5 wiket bad ai 29 run, u Manish Sharma ula ioh 3 wiket, katba u Bipin Kumar Ray bad u Agreas Chamcham Sangma kila ioh mar 1 wiket.
Ka Meghalaya mynta kan ap ban iakhun pyrshah iaka Nagaland ne ka Arunachal Pradesh ha ka phainal bad kine ki ar tylli ki kynhun kim pat dep ha kajingiakhun iaka semi final ka jongki.
Ka Meghalaya kala dep ban pynrem teng ia kine ki ar tylli ki kynhun ha ka round robin stage bad kumba long mynta ka Meghalaya kala jop lynter ha baroh 6 tylli ki jingiakhun bad kaba sah mynta ka long sa tang ban jop ia ka phainal ban long syndon ka lahduh ha katei ka jingiakob.
Ka phainal kan sdang ha ka 18 tarik u Rymphang bad iaka jaka ban pynlong ia ka jingialehkai yn sa pynbna kham hadien.
