Shillong, Nailar 1 : Da ki spah ngut ki nonghikai contractual ba la shah weng kam hapoh ka lama jong ka Meghalaya LP School Contractual Association (MLPSCA) ki la mih paidbah ban īakhih da kaba iaid paidbah naduh markhap ka jaka sah jong u Myntri Rangbah ter ter shaduh ophis MBOSE ban dawa ban thung kam biang ia ki.
Shwa kane ki nongialam jong katei ka kynhun ki nonghikai ki la byrngem ban pynlong da ka nongshong kyllain myngor hakhmat ka iingsah u Myntri Rangbah.
Hynrei dei hadien ka jingia kren bad ki bor distrik ba ki nonghikai ki la mynjur ban pynlong noh da ka jingiaid rally shaduh ophis MBOSE.
Haba kren bad ki lad pathai khubor u nongialam jong kitei ki nonghikai bah Birbor Riangtem u la ong ba ki dawa na u Myntri Rangbah ka jylla ba un shimkhia lang halor katei ka jingeh kaba ki 800 ngut ki nonghikai ba shah weng kam ki kynduh.
U Bah Riangtem u ong ruh ba ka jingdawa ba ki buh ka long beit tang ban thung kam biang ia ki namar bun ki nonghikai kidei kiba la heh rta kaba buh jingeh ia ki ban iakhun biang ia ka eksam MTET.
“Haduh mynta ki don palat 800 ngut ki nonghikai contractual kiba la don ha ka kam na ka bynta 10 snem kiba la shah weng kam naduh u Kyllalyngkot 2020 hadien ba ka sorkar ka la pyntreikam ia ka MTET,” ong u Bah Birbor.
