Guwahati, Rymphang 11 : Ka Sorkar Assam ha ka sngi Saitjain kala mynjur ia ka Assam Healing (Prevention of Evil) Practices Bill, 2024, ka ban tehlakam ia ki briew kiba kam bad ki lah ban pynkhiah/sumar briew da ki bor jadu.
Kane ka Bill ka khang ia ka jingsumar bad buh ia ka kyndon kaba tyngeh ia kine ki briew kiba kjit ia ka pisa na ki briew ba duk ba rangli ha ka kyrteng jong ka jingsumar.
Baroh ki iatip ba bun ki briew ba duk ba rangli kila shah kjot ha ka kyrteng ka jingpynkhiah da ka bor jadu bad kine ki nong pynkhiah kila shim kabu ia ka jingbiej bad jinglong ba duk.
Kiba bun ki briew kila kam ialade ba ki dei kiba dok sap ha ka bor jadu haba sumar ia ki briew kum ha ka jingpang kyllut matlah, duna dkhot met, ka jingpang ba ktah ia ka bor pyrkhat bad kiwei kiwei.
Kane ka Bill ka thmu ban khein nongleh bymman bad pynsajia ia kine ki briew da ka jingset along bad ka kuna lada shem ba ki donkti ban leh ia kum kine ki kam.
