Shillong, Rymphang 07 : Ka Sorkar Jylla kala tyrwa ban pynlut palat ia ka T.2,500 klur na ka bynta ban tei ia ka Administrative City ha New Shillong Township.
Haba pyntip ia kane ha ka jingialang ba long hynne ka sngi Balang, u Myntri Rangbah Conrad K Sangma ula ong ba kane ka Administrative City bala thmu ban tei, kan sa sdang paw kam noh shen ha ka thain Mawdiangdiang.
“Kan dei ka project ka ban shongdor palat ia ka T. 2,500 klur lada hi dei ban kynthup ia baroh naduh ka jingpyniasoh surok, jingpynpoi umbam umdih bad ka jngpynieng ia ki jingtei bapher bapher” ula ong.
U Myntri Rangbah ula ongn ba dang shen ula shim ia ki jingthoh ba iadei bad ka design (jingpynwandur) ia ka Administrative City bad shen un sa rah ia kane hapoh ka jingialang jong ka Kynhun Myntri.
“Shisien ba ka Kynhun Myntri kala ai jingmynjur ia ka design, ngin sa lah ban khot tender ia ki kam hadien bala dep pyn khreh ia ki DPR ka ban long haba kut jong ka quarter ba 2 u snem 2024-2025” ula ong haba bynrap ba u kyrmen ba hapoh kane ka samoi ba mynta, ka Sorkar kan lah ban pynkynriah noh ia ka Secretariat lada ym dei ia baroh ki Directorate, sha kane ka Administrative City ba thymmai.
Kat kum ka jingong jong u, ka jingthmu hi ka long ban wanrah ia ka synshar khadar bad ka jingshakri sha ki paidbah hapoh kawei ka tnum lane kawei ka phyllaw khnang ba ki paidbah ki lah ban leit tang shi jaka bad ioh lut ia baroh ki jingshakri bad baroh ki jingiarap ba ki donkam. “Kane ka dei ka thong kaba ngi dang pynkhreh” ula ong.
Nalor kane, u Myntri Rangbah ula pyntip ba ka Sorkar kala dep ruh ban mang pisa ba T.100 klur ban tei ia lai tylli ki surok kiba lam sha ka Administrative City ba thymmai, ia kiba la buh mawnongrim dang shen.
“Ki tender kila mih bad ki kam ki dei ban sdang noh hapoh kine ki khyndiat bnai. Ngi khmih lynti ba hapoh u snem mang tyngka ban wan, baroh kine ki lai tylli ki surok kin dep noh khnang ba ki jingtei jong ka Secretariat ruh kan iaid wut wut” ula ong.
