Shillong, Rymphang 03: Ka Ramakrishna Mission hynne ka sngi Saitjaiñ kala pynlong ia ka Convocation kaba 103 jong ka jingai jinghikai Computer ha ka Auditorium jong ka Ramakrishna Mission Vivekananda Cultural Centre ha kaba 414 ngut kila pyndep iaka jingioh jinghikai.
U DK Prasad, Deputy Superintendent of Police (TAP) Meghalaya kum u kongsan, ula iaroh ia ki jingai jingshakri ka Ramakrishna Mission ia ka imlang sahlang ha ki kam bapher bapher khamtam ha ka por jong ka khlam Covid.
Ula ong ba u dap da ka jingkhuslai shaphang ka jingkynrei u drok bad ula kyntu ia ki samla ba kin long kiba husiar shaphang ki jingma ha ka imlang sahlang bad ula kyntu ia ki samla ba kidei ban iasam ia ki jingnang jingstad bad ki jingshemphang kaba ki ioh na kane ka jaka pule sha kiwei pat.
Kila don kumba 582 ngut ki shah hikai bad 414 ngut kila ioh pdiang ia ki certificate jong ka jingpyndep iaka jinghikai.
Nalor kane, kila don lai tylli ki thup jong ki khusnam kum ka Session Toppers, Best Projects, Best Personalities kiba la ai ia kiba shah hikai bad la ai sngewbha da ka kor computer sha ka Gardenia Chyne bad Rosemary R Marak kiba la pyndep hynriew tylli ki jingai jinghikai na kane ka jaka pule.
Ki samla kiba la leh kham bha ha ki jingpule ki long Computer-Beginner: Ka Ibanroilin Lawai, ha ka Computer-Intermediate ka Anjali Kumari, ha ka Computer – Accounting ka KhanchuiJajo, ha ka DTP (Part I) ka Karina Rai bad u Jiwanta Sinha na kiwei kiwei ki jingpule kiba kham halor.
