Shillong, Rymphang 03: Ka Mission Smile Guwahati ryngkat ka jingsnohkti lang bad ka Rashtriya Bal Swasthya Karyakram District Early Intervention Centers hynne ka sngi ka la pynlong ia ka Screening bad ban puid ia kiba shitom na ka jingkad ka shyntur kaba la tip ha ka ktien nongwei kum ka Cleft Lip bad Cleft Palate.
Ia kane ka Screening la pynlong ha OPD Building jong ka Ganesh Das Hospital Shillong bad ki kmie ki kpa na kylleng ka District jong ka Jylla, ki la wan ialam ia la ki khun naduh kiba dang kha haduh kiba la 18 snem ka rta ban ioh ia kane ka jingshah sumar ei.
Haba kren sha ki lad pathai khubor, ka Medical Superintendent ka Ganesh Das Hospital Shillong Dr. Adreena Lyngdoh ka la iathuh ba ka jingthmu jong kane ka Prokram ka long ban iarap ia kito ki briew kiba duna ka ioh ka kot ba kin ioh phah sumar ia ki khun ba kad shyntur khlem kano kano ka jingsiew.
Ka Dr. Adreena kala iathuh ba ka thong jong ka Prokram kadei ruh ban pyllait ia ki briew jong ka Jylla na kum kine ki jait jingpang bad kane ka long ka sien ba-ar ba ka Ganesh Hospital Shillong kan pynlong ia kane ka Prokram.
Kala iathuh ba ha kane ka kynti, kiba la wan ban shah Screening ki la poi sha ka 76 ngut bad kiba la shah sumar ki long 54 ngut.
Ka Dr. Adreena ka khot ka wer ia ki kmie ki kpa ba lada ki don ia ki khun ba kad shyntur ba kin wan shakhmat ban sumar ia ki ha kane ka hospital.
Ha kane ka sngi, la donlang bad synran da ki doctor na Ganesh Das Hospital bad ki doctor jong ka Mission Smile Guwahati.
Naka liang u Dr. Hiteswar Sarma u la ong ba ka jingpuid kam dei ban thep da ka doh hynrei la shna ha ka rukom kum ka juk kaba mynta ban suh bad ban pyndap ia ka shyntur ba kad bad ban leh ia kane, hap leh tang shisien shisnem na ka bynta laisien bad kan shimpor 3 snem ban pynbit pynbiang ia ka shyntur bad kumjuh ruh ban pynbeit artad ia ka rukom kren jong ki heprit ban lait na ka jingthlun.
