Nongpoh, Rymphang 2: Ka Myntri Sorkar Kong Ampareen Lyngdoh hynne ka sngi Thohdieng, kala plie pyrda ia ka jingrakhe jubili rupa jong ka Seng Samla Nongthymmai 14-15 mile, Byrnihat.
Ia kane ka jingrkhe la plie ha ka jingiadonlang u MLA ka Jirang Bah Sosthenes Sohtun, u MDC Bah Victor Rani, u Rangbah Shnong Bah Alin Suting bad kiwei kiwei. Kum ka dak ban pynpaw iaka jingsngew nguh ia u synniang u bynhei jong ki nongialam barim, ka Seng Samla ka la pynkup burom ïakine ki Nongialam ki ba rim bad ïaki nongialam jong ka Seng Samla kiba khlad noh na kane ka pyrthei. Ki la ïoh ruh ban pynkup burom ïaki khun samla kynthei bad shynrang kiba kloi ban mih shakhmat ban aiti met bad mynsiem sha ka kam shnong ha kaba iadei bad ki kam ïap kam im.
Haba kren ha katei ka sngi, Ka kong Ampareen Lyngdoh ka la pynpaw ïaka jingïaroh ïaki Nongialam ka Seng Samla kiba la lah ban bteng ïa ka kam ban shakri ïaka shnong naduh u snem 1999 bad haduh kane ka sngi kaba mynta. Ka la pynpaw ruh ïaka jingsngewtynnad ban ïohi ba ki nongialam barim jong ka seng Samla kiba naduh ki snem kiba mynshwa ki la iadon ryngkat lang bad kane ka kynhun kaba mynta ban ïatrei lang met bad mynsiem naka bynta ka sngi rakhe jubilee rupa jong ka Seng Samla Shnong.
Shuh shuh ka la ong, ba wat hapdeng la jinghiran ha kaba iadei bad ka jingiatip lem, ka jingsngew marwei, ka jinghiran jong ka jinglen lade bad kiwei kiwei hynrei kane ka Shnong ka la lah ban btin lynti iaki khun samla ban ïaid haka lynti kaba dei. Kala iathuh ruh ba haki jaka sor, kine ki jinghiran ki long ki daw bah jong ka jinglah ban shah tynjuh bad shah pynshoi ha ka juk kaba mynta.
Ha kane ka sngi, ka kong Ampareen Lyngdoh ka la ong ba lada kane ka Seng Samla ka donkam ïaki jingiarap kiba kham khraw ban kyrshan naka bynta ban kyntiew ïaki khun samla haka lynti kaba dei, la ka dei haka jingwan lam ïaki khun samla kiba la ngop haka jingdih pyn buaid sha ka lynti kaba ka dei, la ka dei haka jingai jinghikai bapher bapher ïaki khun samla ba kin lah ban ïeng ha la ki jong ki kjat lane kino kino ki mat kiba iadei bad ka imlang ka sahlang, naka liang jong ka kum ka Myntri jong ka sorkar ka long kaba kloi ban ïa snoh kti lang bad ka seng Samla naka bynta kine ki kam.
