Malda, Rymphang 02 : Ha ka jingjia ba shyrkhei, uwei u briew ula pyniap iala ka jong ka Khun Pyrsa ba dang 11 snem, da kaba mait pyndkut ia ka khlieh ha Malda, West Bengal.
Kane ka jingjia kala paw pyrthei hadien ka jingshem ia ka dkhot met bad ka khlieh jong kane ka Khynnah na ki jaka bapher bapher ka Malda. Kane ka Khynnah kala jah rngai naduh ka 29 tarik Kyllalyngkot.
Ki Pulit ka West Bengal kila lah ban pynthikna ia ka jingdonkti u Pakhynnah jong kane hi ka Khynnah lyngba ki video CCTV kiba pyni shai ba une u pakhynnah ba 27 snem, ula iadon khatduh eh bad kane ka khynnah shuwa ba kan jah.
Shuwa kane, u Kpa jong kane ka Khynnah ula ujpr sha ki Pulit ba pyntip ia ka jingjah rngai kane ka khynnah ha ka por 6:15 baje janmiet jong ka 29 tarik Kyllalyngkot.
Halor ki video CCTV, ki Pulit kila lah ban kem ia une u briew uba la pynithuh hadien ba u dei u pakhynnah jong ka hi,
Kat kum ka jingiathuh ki Pulit, une u briew ula phla ba ula pyniap ia kane ka khynnah ban pynhiar kput ia u Kpa jong ka, uba la soh bad pynkhlem rain ia u la bunsien ha ki jaka paidbah.
Ki Pulit kila suba sur ba une u briew lehse ula leh beijot ia kane ka khynnah shuwa ban pyniap.
Ki Pulit kila kynnoh ba une u briew ula kam ba ula pyniap ia kane ka khun pyrsa ha kawei ka jaka ba kynjah tang hapoh shikynta ba u kit ia ka da ka thuk thuk, ban pynhiar kput iala u jong u hynmen.
