Guwahati, Rymphang 02 : Ka Sorkar Assam kala pynkhreh nadong hadong ban wanrah iaka Bill thymmai ha ka Dorbar Mang Tyngka jongka Iingdorbar Thaw Ain kaban pynkylla ia ka Jylla kum ka Tourism hub.
Kawei na ki kyndon ba tyrwa ha kane ka bill thymmai ka long ban thaw ia ka Committee ka ban leh ia ka safety audit (bishar iaka jingshngain) jong ki jaka jngohkai bad kiwei kiwei ki kam.
Kane ka Bill ba tip kum ka Assam Tourism Development & Registration Bill 2024, ka dei kaba la mynjur da ka kynhun Myntri myn ha ka miet sngi Balang hapoh ka jingialam u Myntri Rangbah Himanta Biswa Sarma.
Haba iakren bad ki nongthoh khubor, u Myntri Sorkar Jayanta Malla Baruah ula ong ba ia kane ka Bill yn sa wanrah noh ha ka Dorbar mnag tyngka ban wan jong ka Jylla. “Kane ka Bill kan wanrah shibun ki jingmyntoi bad pynthikna ia ka jingkiew ka ioh ka kot lyngba ki kam pynroi ha ka kam jngohkai ha Assam” ula ong.
Kane ka Ain thymmai kan pynthikna ruhba baroh ki briew ba trei ia ki kam ba iadei bad ka kam jngohkai kin hap ban pynrung kyrteng ialade bad kan don ruh ka kuna lada ki pynkhein iaki kyndon jong ka Bill.
