Shillong, K’lyngkot 30 : U Myntri Rangbah ka Jylla Conrad K Sangma ha ka sngi Ba-ar, ula ong ba ka Sorkar kala kut jingmut ban kynshew pisa bha sha ka pule dangle bad ban pynkhlain ia ki jingtei Iingskul kiba dei jong ki Higher & Technical hapoh ka Jylla.
U Myntri Rangbah ula kren ia kane haba plie ia ka Sohra Government College, East Khasi Hills.
U Conrad ula kren halor ki plan halor ki jingpule jong ki kyrdan ba shajrong da ka jingmih jong ki jaka pule ba pynleit jingmut halor ka Science, Engineering bad Architecture hapoh ka Jylla.
Ula batai ruh ba ka rai kaba jwat la shim ha kaban wanrah ia ki jingpynjanai ia ka pule dangle bad ai khublei ia u Myntri Pule Puthi barim Bah Lahkmen Rymbui halor ki rai bad ki sienjam ba ula shim, kiba pynpaw ia ka thong jong ka Sorkar ban wanrah ia ki jingkylla ha ka kam pule dangle.
Haba kren halor ka education cess ne ka khajna ha ka pule dangle, u Myntri Rangbah ula ong “Da ki snem, ka khajna halor ka pule dangle la lum da ka Sorkar hynrei ym ju pynlut satia. Ynda ngi la shimti ma ngi, ngi la rai ba man ki shi naia b alum lyngba ka khajna dei ban pyndonkam sha ka kam pule dangle. Na ka khajna, ngi la sdang ban shna ia ki jingtei kiba thymmai bad kumjuh ruh ia ka jingpynbha ia ki skul bad college bapher bapher.
U Myntri Rangbah u pyntip ruh ba baroh ki skul Secondary jong ka Sorkar ha Jylla, kila ioh ia ka jingmynjur ban maramot lane ban tei thymmai ia ki Iingskul. Nalor kane, kumba 2500 tylli ki skul LP lah dep ban maramot lane shna da ka mang tyngka ba T. 500 klur.
Haba kren halor ka jingpyndonkam ia ki kot NCERT hapoh ka Meghalaya Board of School Education (MBoSE), u Conrad ula batai “Ka Mathematics bad ka Science ki dei kiba long kumjuh ha satlak ka pyrthei. Ka jingpyntreikam ia ki kot NCERT kan pynthikna ba ki khun jong ngi kin ialong kumjuh bad ki samla pule jong ka pyrthei baroh kawei”. Ula kular ruh b aka MBoSE kan bud ia ki kyndon ka NCERT bad ban pynrung ia ki jingstad nala tynrai (Traditional Knowledge) ha ki kot skul.
Haba ban jur halor ka jingkongsan ki kot NCERT, u Conrad ula ong ba ki kot kin pynthitna ia ki jingthoh kiba shongdor, kin iarap ban nang lah pynmih ia ki khynnah ba stad bad kin kyntiew haduh 15-20 % ha ka graph jong ka PGI.
Da ka jingwanrah ia ki sobjek bapher bapher hapoh ka NEP 2020, u Myntri Rangbah ula ong ba baroh ki college Sorkar ha ka Jylla kin sa sdang noh shen ia ka tnad Commerce bad Science.
U pyntip ba ka jingtyrwa mynta ka dang don hapoh ka Tnad Finance bad yn sa wanrah sha ka jingialang jong ka kynhun Myntri ban ai jingmynjur. Kum u Chairman ka kynhun Myntri, nga kular ba ngin ai jingmynjur ia kane ka jingtyrwa namar ka dei na ka bynta ka bha ka miat jong ki samla pule.
Ha kane ka sngi la iadonlang u Myntri ka tnad Pule Puthi Rakkam A Sangma bad ka Myntri ka Koit ka Khiah Kong Ampareen Lyngdoh.
Ia mynta, ka Sorkar kala ai ia ka bhah mang tyngka ba hehduh sha ka Tnad Pule Puthi kaba long haduh T. 2000 klur haba ia nujor bad kiwei kiwei ki tnad Sorkar.
