Shillong Kyllalyngkot 26: Ka jylla Meghalaya da kaba iasnohkti lang bad ka ri hi baroh kawei, hynne ka sngi Thohdieng kala rakhe ia ka Republic Day kaba 75, ha kaba u Lat ka jylla u Phagu Chauhan ula pynher iaka lama jong ka ri bad shim iaka Rashtriya Salute na ki kynhun kiba iaid Parade ha Madan Polo, Shillong.
U Lat ka Jylla ula sam ruh iaka khusnam Meghalaya Day Award sha u Risingbor Kurkalang da ka Tirot Sing Award ha ka Arts & Literature, ka Dr Delphine G Momin ia ka Pa Togan Sangma Award ha ka Social Service bad u Phrangki Buam ia ka Kiang Nangbah Award haka Sports and Games.
Ha kane ka jingrakhe la sam ruh ia ka Megha Health Insurance Scheme (MHIS) & Pradhan Mantri Jan Yojana (PMJAY) Awards sha ki hospital sorkar bad ki Hospital shimet kiba la ai ka jingshakri kaba bha ha kaba ka Pomlum PHC kala ioh ia ka nam Top Performing PHC ha East Khasi Hills District katba ka Maphlang CHC kala ioh ia ka Nam Top Performing CHC ha ka jylla baroh kawei.
Ka Bethany Hospital bad ka Bansara Eye Care Center kala ioh ia ka Nam Top Performing Hospital ha ka jylla. Ia ka nam Top Performing Chest Hospital ha ka jylla la ioh da ka Reid Provincial Chest Hospital bad ka Top Performing Maternal and Child Hospital ha ka jylla la ioh da ka Ganesh Das Government Maternal & Child Hospital, East Khasi Hills District.
Nalor kane ka Reid Provincial Chest Hospital, East Khasi Hills District kala ioh ruh ia ka khusnam jongka Ayushman Bharat Pradhan Mantri Jan Arogya Yojana Quality Certification Hospital.
Ha kane ka sngi la pynbna paidbah ruh ia ka kyrteng jong ki pulit kiban ioh pdiang iaka Police Medal for Meritorious Service (MSM) kiba kynthup ia u Bah Vivek Syiem, Superintendent of Police (City), u John M Sangma, AB-Inspector bad u Bah Teibor Sumer, Havildar katba ka Kong Aniosca Basaiawmoit, Inspector kaba dei ka Senior Instructor ha Central Training Institute of Civil Defence and Home Guards, Mawdiangdiang kala ioh ia ka Home Guards & Civil Defence Medal for Meritorious Service.
Ia kane ka jingrakhe la pynihpuh da ka jingpyninam ia ki Tableau kiba la pynkhreh kyrpang da ki tnad bapher kiba kynthup ia ka Tourism Department, ophis jong ka Deputy Commissioner, DCIC-East Khasi Hills, Superintendent of Fisheries, Meghalaya State Skills Development Society, District Animal Husbandry and Veterinary, District Horticulture, DFO, Social Forestry, NCC, Divisional Soil and Water Conservation bad District Election Officer.
Ia ka nam Best Tableau la ioh da ka DCIC-East Khasi Hills, ka Meghalaya State Skills Development Society kala wan baar bad ka District Animal Husbandry & Veterinary kala wan balai.
Ha ka jingiaid March Past, ka NCC Girls kala wan nyngkong, baar ka NCC Boys bad ka Sacred Heart Girl’s Hr. Sc. School kala wan balai.
Ha kane ka jingrakhe la pynlong ruh iaka cultural programme kaba la iashimbynta da ka Seng Khasi Higher Secondary School, Mawngap District Christian Multi-Purpose Higher Secondary School, Sanmer Higher Secondary School, Upper Shillong bad Mission UP SSA School, Mawryngkneng.
