Shillong, K’lyngkot 23 : U Myntri Rangbah ka Jylla Conrad K Sangma ula ong ba ka jingthungkam ia ki Ophisar ba dang don hapoh ka jingshakri, hapoh ka Ophis ka Lokayukta ka dei kaba iaid kat kum ka rule bad ban pynthikna ruh ba kan ym don ka jingtam ha ka jingpynlut ka Sorkar.
Haba iakren bad ki nongthoh khubor halor kane ka kam, u Conrad ula ong ba ka Sorkar kala dep ban pynshai la bun sien ba ka kyndon kaba la thungkam ia ki briew mynshuwa bad ka Rules ka dei kaba khlem bud namar ba ka dei ka jingpynbeit ba shipor na ka daw ka jingduna ki Ophisar ha katei ka por.
“Namar ba ka dei ia ki Ophisar kiba bat kyrdan Secretary bad halor, ngi la iakynduh jingeh na ka daw ka jingduna Ophisar bad kumta ngi la rai ha katei ka por ba ngin shu thungkam shipor da ki Ophisar bala shongthait, kaba iaid lait ia ka Rule. Kumta ngi hap ban pynbeit bad iaid kat kum ka rule kaba ong ba ki dkhot ka Lokayukta ki dei ban dei ki Ophisar kiba bat ia ka kyrdan Secretary bad ba dang don ha ka jingshakri”.
Nalor kata, u Myntri Rangbah ula ong ba ka Sorkar kan hap ban pynlut pisa tam halor ka jingthungkam ia ki Ophisar kiba la shongthait.
Lah ban kdew, ka VPP kala rai ban sangeh shipor ia ka jingiakhih hadien ba ka Sorkar kala kular ban sa iashong jingialang bad ka party halor kane ka kam.
Haba kylli lano ba un khot ia ki nongialam ka VPP, u Conrad ulaong “Ka jingkhang jong ngi ka plie beit bad lada don mano mano ba kwah ban iakynduh, ki lah ban wan bad iakynduh ia nga”.
