Shillong, K’lyngot 17 : U Symbud Myntri Rangbah ka Jylla ba khmih ia ka kam Pohiing Bah Prestone Tynsong ha ka sngi Balang, ula bthah ia ka Liang Pyrshah Voice of the People Party (VPP) ba kan pule ia ka Meghalaya Lokayukta Act shuwa ban dawa thungkam biang ia ki Ophisar, kiba la shah wengkam dang shen ha u Lokayukta.
Haba iakren bad ki nongthoh khubor, u Bah Prestone ula ong “Ai ba ka (VPP) kan pule shuwa ia ka Lokayukta Act. Da pule thikna bha bad sa wan mih ryngkat ki jingujor”.
Ka VPP kala aipor 24 kynta ia ka Sorkar Jylla ba kan thungkam biang ia ki Ophisar bala shah weng jong ka Lokayukta.
Ula pyntip ruh ba ka Sorkar Jylla kala dep ba pynshai halor kane ka kam. “Khlem da pule ia ka Ain, nga tharai kam iahap satia bad ka rule ruh kala kdew shai ba ki Ophisar jong ka Lokaykta ki dei ban dei kiba dang don ha ka kam ym kiba la shongthait” ong u Bah Tynsong.
“Phi lah ban ong kat kaba phi mon hynrei nga ong ia phi ba na ka liang ka Sorkar shuwa ba kan leh eiei, ka da pyrkhat shispah sien la ka dei ka jingthung kam Chairman/Co-Chairman, la ka dei ka jingthung kam contract ha kino kino ki ophis, ngi la leh da kaba pyrkhat bha. Namar kata, ka (VPP) lah ban ong kat kaba ka mon hynrei ngi don la ki jong ki kyndon bad ki rule, ngi hap ban bud thik pa thik ia ki” ula bynrap.
