Shillong, Naitung 27 : Kum shi bynta jong ka jingrakhe ia ka ‘Azadi Ka Amrit Mahotsav’ –kaba long shi bynta ban rakhe ia ka jingdap 75 snem jong ma jingïoh laitluid jong ka Ri India, ka Ministry of Power ha ryngkat ka jingtreilang bad ka Power System operation Corporation Limited bad MePDCL ka la pynlong ia ka ‘Bijli Mahotsav’ ha Pynursla, East Khasi Hills district ha ka 26 tarik mynta u bnai.
Ha kane ka sngi la wan ban donlang ruh da u MDC ka Langkyrdem Laitkroh Bah Ryngkatlang Lyndem kum u Kongsan.
Ka jingrakhe ia ka Bijli Mahotsav ka long kum ka rynsan ban rakhe ia ka jingiatreilang hapdeng ka sorkar jylla bad ka sorkar pdeng haba iadei bad ka tnad pynmih bording.
Katto katne na kitei ki kam ki kynthup – Ka jingkyntiew ia ka jingpynmih bording na ka 2,48,554 MW ha u 2014 sha ka 4,00,000 MW kaba long palat 1,85,000 MW ia ka jingdawa ne ka jingdonkam.
Ka India mynta ka la shalan ruh ia ka bording wat sha ki ri ba marjan. Ka kyrwoh ka ong ruh ba ka thong ba ki buh ha ka COP21 ba shwa u 2030, 40 persen na ka jingpynmih bording kan dei beit na ki Renewable Energy Resources lane na ki thymmei ki bym duh shuh lane lut noh. Ia kane ka thong la dep ban ioh ha u Naiwieng 2021 kaba long 9 snem shwa ka por ba la buh.
La kdew ruh ba mynta la lah ban pynmih haduh kumba 1,63,000 MW tang na ka Renewable Energy Resources.
Lah ban kdew hangne ruh ba ia ka Bijli Mahotsav la ju rakhe ha baroh kawei ka Ri hapoh ka lama jong ka Ujjwal Bharat Ujjwal Bhavishya – Power @2047.
Ha katei ka jingialang la wan ban donlang ruh naduh u BDO ka Pynursla C&RD Bah G Warjri, nangta u District Nodal Officer bad Senior GM (HR), NERLDC, POSOCO, u V F Desouza nalor kiwei kiwei.
