Nongpoh, Nohprah 30: Ka Dorbar Shnong Saiden hynne ka sngi Saitjain, ka la pynmih ia ka jingmaham bad ka jingmana ia baroh ki riew paidbah kiba thmu ban leit bam khana ne picnic ne wat ban leit shong pyngngad sha ka jaka bna nam kaba la tip kum ka Iewsier kaba don ha u pud u sam jong ka shnong Saiden.
Haba pyntip lyngba ki Lad Pathai Khubor, ka Dorbar Shnong jong ka Saiden, kam shem la khang ia ki paidbah ban leit bam picnic ne bam khana sha Iewsier, hynrei namar ka jingshem ha ki snem ba la leit noh, ki la don ki jingpynkhein ia ki adong ba la buh da ka shnong, kumta ka la pynmih syndon da kane ka jingmaham kaba tyngeh.
La ong ba ka Dorbar Shnong Saiden, ka la maham ia kiba leit bam khana sha Iewsier ba kim dei ban leh ia kino kino ki kam awria, ban pynmih ia ki jingklumar, ban bret pathar ia ki jakhlia, ki bitor bad kiwei kiwei bad lada lap ia kum kito kiba pynkhein ia kane ka jingmana, ka Dorbar Shnong kam banse ban pyngngat ia ki ha ki jingpynshitom kiba tyngeh.
Ha kaba ia dei pat bad ka por, na ka liang ka Dorbar Shnong Saiden ka la buh ba ki nongleit bam khana sha Iewsier ki dei ban pyndep hapoh ka por 8 baje eiei janmiet.
