Shillong, Nohprah 29: Ka Meghalaya kala sakhi ia ka sain hima sima kaba thnem iew bha ha u snem 2023 nalor ka jingia khih iaksaid jong ka Jylla halor kiba bun ki ishu kiban pynskhem bad tei ia ka lawei jong ki trai riewlum ka Jylla bad ki nongshongshnong baroh kawei.
MLA elekshon 2023: Thaw Sorkar ka NPP, sah dukha ki seng riewlum
Ka National People’s Party (NPP) kala ioh biang ban thaw ia ka Sorkar Meghalaya Democratic Alliance (MDA-2.0) ha ka 5 tarik Lber hadien ka elekshon Assembly 2023.
Ia ka Sorkar MDA la thaw da ka jingkyrshan jong ki saw tylli ki seng sain pyrthei- ka United Democratic Party (UDP), People’s Democratic Front (PDF), Bharatiya Janata Party (BJP), Hill State People’s Democratic Party (HSPDP) bad ki MLA shimet.
Ka jingkhlain bor jong ka Sorkar MDA-2.0 ka kot haduh 45 ngut ki MLA ba kynthup ia ka NPP-26, UDP-11, PDF-2, HSPDP-2 bad 2 ngut ki MLA shimet.
Kala mih ka jingpyrshang ban thaw ia ka Sorkar bym khleh NPP-BJP hadien ka elekshon hynrei kane kala pulom noh da ka jingmih syndet ki 2 ngut ki MLA ka HSPDP na ka jingialang kaba long hapdeng ki 4 tylli ki seng riewlum-UDP, VPP, PSF bad HSPDP kaba kyrshan da ka Congress bad ka AITC. Kine ki MLA ka HSPDP kila leit ban kyrshan ia ka NPP.
Tang hadien arbnai ba thaw Sorkar, ka PDF ha ka 6 tarik Jymmang, kala leit ban synrop noh ialade bad ka NPP ia kaba la pynshong nongrim ha ka soskular ba 11 mat, kaba kwah ban pyntreikam ia ka roster system na ka bynta ki snem ba shakhmat, ban pyntreikam ia ka Inner Line Permit (ILP) bad kiwei kiwei ki ishu.
Ka PDF ka don 2 ngut ki MLA- Bah Gavin M Mylliem (Sohra) bad Banteidor Lyngdoh (Mawkynrew) – ha ka Iingdorbar Thaw Ain bad kane ka jingleit synrop kala nang pynkhlain ia ka jingdon MLA ka NPP sha ka 28 ngut ha ka IIngdorbar ba 60 ngut ki MLA bad kaba pynkut noh ruh ia ka jingiaid lynti ka PDF kum ka seng sain pyrthei hadien 6 snem ba thaw ia ka.
Thnem ka Jylla na ka jingiakhih State Reservation Policy:
Ka State Job Reservation Policy ruh ka dei kawei ka ishu ba thnem bha ha Meghalaya mynta u snem da ka jingmih paidbah u Nongialam ka VPP Ardent M Basaiawmoit ban shah jingit kaba neh haduh 10 sngi (221 kynta) tad haduh b aka Sorkar kala mynjur ban thaw ia ka Expert Committee ban shong bishar thymmai ia ka Job Reservation Police 1972. Kane ka jingshah jingit kala sdang naduh ka 23 tarik Jymmang.
Ka dei ha ka 25 tarik Nailar, ka Sorkar Jylla kala mynjur ban thung ia u Judge barim ka Madhya Pradesh High Court Justice (Rtd) Mool Chand Garg kum u Chairman ka Expert Committee ban bishar thymmai ia ka State Reservatio Policy. La bthah ia kane ka committee ba kan pyndep ia kane ka kam hapoh ka 12 bnai.
Sdang ka jingiakren pynbeit pud jong ka wat kaba ar:
Kum shibynta na ka jingiakren pynbeit pud jong ka wat kaba ar bad ka Assam, ka Sorkar Jylla kala thung ruh ia lai tylli ki Regional Committee ban shong bishar ia ka jinglong jingman ha ki 6 tylli ki jaka bym pat pynbeit ia ka jingiakajia bad ban aiti ruh ia ka kaiphod hapoh ka 45 sngi.
Kine ki jaka ki kynthup ia ka Langpih ha West Khasi Hills District; Borduar, Nongwah-Mawtamur, Deshdoomreah, Block-II ha Ri Bhoi District; Block- I, bad ka Psiar – Khanduli ha West Jaintia Hills District.
La bthah ia kine ki lai tylli ki Regional Committee ba kin aiti noh iala ki jong ki jong ki kaiphod hapoh ka 31 tarik u Nohprah.
Wanrah ka Sorkar da ka CM-Elevate ban iarap ia ki samla ba kwah sengkam lajong :
Ka dei ka sngi sah jingkynmaw ha ka histori jong ka Meghalaya haba u Myntri Rangbah ka Jylla Conrad K Sangma, ha u bnai Nailur ula pyllait paidbah ia ka skhim bala ap khmih lynti bha ka CM-Elevate Programme, ka prokram kaba kyrshan ia ki samla nongshongshnong ha ka jing sengkam sengjam ban kyntiew ia ka ioh ka kot bad ban ioh ia ka lawei ba phyrnai.
Ka thong jong kane ka prokram ka long ban plie lynti bad kyrshan ia palat 20,000 ngut ki samla ba kin sengkam sengjam lajong ha ki kam bapher bapher ha kine ki lai snem ban wan. Ka Sorkar kala buh ruh ia ka song pisa ba kot T. 300 klur ban pynlut ha kane ka prokram.
Thaw ka Jylla ia ka State Education Commission ban saindur thymmai ia ka pule dangle:
Ha ka jingpyrshang ban pynkylla janai ia ka kam pule dangle ha Meghalaya, ka Sorkar Jylla kala thaw ia ka State Education Commission (SEC) ka ban khmih ia ki jingpynkylla thymmai ha ka rukom treikam jong ka kam pule dangle ha Jylla. Ka samoi treikam jong ka SEC kan kut hadien 2 snem ba pynmih ia ka jingpynbna.
Ka Commission kala shah tynrong ruh ia ka kamram ban ai jingmut ia ka Sorkar Jylla halor ki kam ba iadei bad ka rukom pyniaid ia ki skul bad college, ka tulop ha ki skul bad college bad ka jingtreikam jong ki Management Committee ki skul.
Naduh 2024 yn pyndonkam noh ka MBoSE da ki kot ka NCERT:
Kawei pat ka rai kaba heh bha ka dei ka jingmynjur b aka Meghalaya Board of School Education (MBoSE) kan pyndonkam lang noh da ki kotskul jong ka National Council of Educational Research & Training (NCERT) na ka bynta klas I haduh klas X naduh une u snem ban wan.
Pynbna ka Sorkar da ka thma pyrshah ia u droks:
Ka Meghalaya kala pynbna ban iakhun thma pyrshah ia u droks. Ka Sorkar kala iasoi ruh ia ka soskular bad ki kynhun bapher bapher kynthup ki sengniam bad ki dorbar Shnong ha u bnai Nohprah ban iakhun ia u droks nalor ban iarap ia ki nongdih ba kin lait noh na u droks hapoh ka DREAM Project.
U Myntri Rangbah Conrad K Sangma ula pynbna ruh ia ka prokram sengkam sengjam ia ki samla kiba la iehnoh ia ka jingkyrni dih drok bad kylla kaba mut.
Lok Sabha Elekshon 2024:
Shuwa ban wan ka elekshon Lok Sabha 2024, ka NPP bad ka BJP kila thung thymmai ia ki President ka Jylla-u Bah Prestone Tynsong ia ka NPP bad u Rikman G Momin ia ka BJP.
Ka NPP kala pynbna ia ka kyrteng ka Myntri Sorkar Kong Ampareen Lyngdoh bad ka MP ka Tura Agatha K Sangma kum ki kyrtong ban aireng ha ka elekshon na Shillong bad Tura Parliamentary seat.
Jingpluh ding ha Khyndailad:
Ka jingpluh ding kala shyrkhei bha ha Khyndailad ha u bnai Naiwieng, kala pynbor ia ka Sorkar Meghalaya ban pan song jingiarap ba kot T. 44 klur na ka Sorkar Pdeng ban pynkhlain ia ka jingtreikam jong ka tnad Fire Service ha Jylla.
Ka Sorkar kala rai ruh ban pynlong ia ka Safety Auditing ia baroh ki Jingtei jong ka Sorkar bad ruh ia ki Iingbala rim jong ki riew shimet, kiba la kynjoh ia ka 50 haduh 70 snem.
