Shillong, Nohprah 28: Ka kynhun ialehkai ka Meghalaya kala long ka kynhun ba nyngkong eh kaban ioh rung sha ka Final jong ka U-16 Boys’ Vijay Merchant Trophy da kaba pynrem iaka Nagaland da 72 run ha ka jingialehkai kaba la long hynne ka sngi Palei ha Bhubaneswar.
Ka Meghalaya kan hap ban iakhun pyrshah iaka Manipur ne ka Mizoram ha ka Final ban ia knieh ban rah ia ka nam Lahduh.
U Apandanka Marak ula bteng biang ban ialehkai bha ha kaba ula shim biang 5 wiket bad ai 45 run ha ki 11 over bad ka Nagaland kala hap lut ki nongtied da kaba kamai tang 92 run ha ka jingleit tied ha ka sien ka baar.
U Apandanka ha ka jingleit kawang bol ha ka sien kaba nyngkong ba ka Nagaland kala tied, ula ioh ban khur 6 wiket bad ai 40 run bad haba khein kyllum ia ka jingioh khur wiket u Apandanka ka long 11 wiket bad ai 85 run.
Kum ban shu pynkynmaw, haka sngi Balang ka Meghalaya kala tied nyngkong bad kala kami 123 run katba ka Nagaland kala kamai tang 83 run bad haba ka Meghalaya kala leit tied biang kala kamai 22 bad ym shim la don ba Out.
Hynne ka sngi Palei, u Aashish Kumar Lohar ula kamai 57 run na ka bynta ka Meghalaya kaba la kamai 124 run bad hap lut ki nongtied bad ka Meghalaya kala tam da 165 run ia ka Nagaland.
Haba ka Nagaland kala leit ban tied ha ka sien ka baar kala kamai 92 run bad hap lut ki nongtied hynrei ha kaba sdang ka Nagaland kala ialehkai bha bad kala kamai 86 run bad hap 3 wiket hynrei hadien kane ka jingiakhun kala kylla kynsan ha kaba 7 ngut ki nongtied kila hap kynsan bad kamai tang 6 run haka 5 over.
Ar ngut ki nongtied ka Nagaland kila khyllem lyngba ka Run Out katba u Thakuria bad u Paisal Ali kila shim mar 1 wiket.
Ka Meghalaya mynta kan ap ban iakhun pyrshah ia ka Manipur ne Mizoram ha ka Final.
Ka Meghalaya kala dep ban pynrem teng iaka Mizoram katba ka Manipur kala dep ban pynrem teng iaka Meghalaya.
