Shillong, Nohprah 18: Ka Hynniewtrep Youth Council (HYC) hynne ka sngi Nyngkong, kala kynmaw burom iaka lyngkhuh sngi ïap ba 83 snem u Soso Tham ha State Central Library.
Ha kane ka sngi ka seng haka jingdon lang u President u Bah Roykupar Synrem, u nongialam barim ka HYC u Bah Robertjune Kharjahrin lem bad ki dkhot na kylleng ki unit kala pynlong ka jingbuh syntiew ha u Motsahnam u Soso Tham Auditorium.
U Bah Roykupar Synrem ula ong ba u Myllung Soso Tham nalor ba udei u riew khraw haka thoh ka tar udei ruh u nonghikai ia ka jaidbynriew.
Haba pynpaw ka jingbynniaw halor ka jingbym shimkhia ka Sorkar Jylla ban kyntiew bad ban ai burom iaki nonghikai, u Bah Roykupar ula ong “Kum ka seng ngi dawa naka Sorkar Jylla ban pynthikna ba baroh ki nonghikai ha ki skul kin shah kynthup haka juh ka thup rukom siew tulop”.
U Bah Roykupar ula ong ba dang shen ki nonghikai bala shongthait kila pynpaw ba kim pat ioh satia iaka bai bam tymmen (Pension) bad kane ka long kaei ka jinglehrain namar kila shakri iaka Jylla haka liang ka pule puthi da ki phew snem.
“Ka Sorkar kam dei tang ban ai burom iaki nonghikai haka sngi kyrpang hynrei kadei ban ai burom bad kyntiew iaki nonghikai ka Jylla da ki Polisi ki ban tei iaka bha ka miat bad ban ai burom iaki nonghikai ka Jylla” la ong u Bah Roykupar.
Haba iadei bad ka jingthmu ka Sorkar ban wanrah noh da ki kot NCERT ha ki skul, u President ka HYC ula ong ba ka Sorkar kadei ban pynthikna ba ki lynnong (Syllabus) ki ban shah kynthup haki kot skul kim dei ban ialam bakla halor ka Histori ki paidbah bad ka Jylla Meghalaya.
U Bah Royrkupar ula ong ba ka Sorkar Jylla kadei ban pynthikna ba ki kot NCERT ki ban pyndonkam haki skul kidei ban pynneh iaka Histori jong ka imlang sahlang bad ka Jylla Meghalaya khamtam haba iadei bad ka jingsynniang ki riewkhraw trai Ri trai muluk iaka Jylla.
Ha kane ka sngi la sam ruh ïa ki khusnam sha ki nong jop jingai jingkren lyngkot (Short speech) kaba la pynlong da kane ka seng.
Ha kane ka sngi ka HYC kala pynkupburom iaki samla kiba ioh jingjop haka jingiakop iatai nia lyngkot halor ka ‘Jingma Ka Jaidbynriew namar ka Jingai Jaitkpa’ bad ka jingthoh Essay halor ka phang pdeng ‘Khulom Ksiar’ ia kaba la pynlong daka Socio Cultural Cell jong ka seng.
