Kohima, Nohprah 18: Ki pulit bad ki shipai jongka Assam Rifles kila ioh ban pyllait im ia ki Ar ngut ki briew kiba la shah rahbor ha ki lehnoh NSCN (K) ha ka Mon District jong ka jylla Nagaland.
Katkum ki khubor ba la iohlum, la iathuh ba ki lehnoh NSCN (K) kila rahbor ia kitei ki ar ngut bad kila dawa pisa lada kwah ban pyllait im biang ia ki.
Kitei ki arngut kila shah rahbor, da kaba shah pynap da ki suloi ha ki kynhun jong ka lehnoh NSCN-K (Ang Mai) kaba pyntriem ha Myanmar, ha ka miet jong ka 15 tarik u Nohprah na ka shnong Yannyu kaba hap ha ka Mon District.
Ki ar ngut kiba la shah rahbor ki kynthup ia u Atua Konyak bad u Tingkon Konyak.
Ki shipai jong ka Assam Rifles bad ki pulit ka jylla Nagaland, haba kila ioh jingtip halor katei ka jingshah rahbor kitei ki arngut, kumta kila pynlong ia ka jingkhynra ban thwet jur ia ki nongrahbor bad kila ioh ban pyllait im ia kitei ki arngut kiba la shah rahbor.
La iathuh, ba ha ka por ba ki pulit bad ki shipai kila leit ban pyllait im kala mih ka jingiather kuli bad ki lehnoh bad ha kane ka jingiather kuli, ki lehnoh kiba la rahbor kila phet krad noh bad kila iehnoh ia ki arngut kiba la shah rahbor.
Ki arngut kiba la shah rahbor kila lait im bad kam shym la don kano kano ka jingma ia ka jingim ka jongki ne ban mynsaw ha ka jingiather kuli.
Ka kynhun ki pulit bad ki shipai kaba la pynlong ia ka jingkhynra kala ioh ban kurup iaki tiar siat bad ki kuli kynthup ia kawei ka suloi M-16 bad 3 tylli ki pistol.
 ha ka Mon District jong ka jylla Nagaland.){kind=link}