Shillong, Nohprah 18: Kawei ka ïing kaba la shu shna malu mala da ka lytang snep bad ka tin kaba don hajrong jong ka Meghalaya Rural Bank, Lum Shatsngi, Kenches Trace, kala shah bamduh ha ka ding kaba la klang bha hynne ka Lah Sngi U Blei.
Haba iakren bad ki bor pyniaid shnong kila iathuh, ba kane ka jingjia kala jia haka por kumba 11 baje bad kadei kaba la longtrai da u Munna Ahmed bad la suba jur ba ka jingsdang jong ka jingpluh kadei namar ka jingklet ban pynlip iaka Gas.
Kila iathuh, ba ia kane ka iingsah kadei kaba la shu shna malu mala ban sah shipor bun ngut ki nongbylla sngi kiba wan ban trei bylla ha kane ka jylla bad ha katei ka ka jingjia ym shim la don ba mynsaw.
Ki pulit pynlip ding kila wan poi mardor bad kila ioh ban tem noh ia kane ka ding shwa ba kan pur sha ki bynta jong katei ka iing building kaba don ia ka Bank bad ka jinglah ban poi kloi ki kali pynlip ding kadei ruh ba ka surok ha kane ka shnong ka kylluid bha namar ka jingduna ban iaid kikali ba ka dang don ka jingpynkhuid shnong ha Lum Shatsngi.
Halor kane ka jingjia, na ka liang u MLA ka South Shillong Constituency u Bah Sanbor Shullai ryngkat bad ki nongialam shnong kila leit ban jngoh ia kane ka jaka kaba la shah bamduh ha ka ding.
Ki bor pyniaid shnong kiba la leit ban jurip ia kane ka jaka, kila kyndit ban iohi ba kane ka jaka kaba la pluh kadei kaba la shna kyrpang ban buhai shnong da ki nongbylla kiba wan na ki jylla bapher bapher.
