Shillong, Nohprah 17: Ka Iew Khristmas ha Shillong kala sdang ban thnem bha bad ki nongshongshnong ym tang na Shillong hynrei na kylleng ki District ka Ri-lum Khasi bad Jaintia, kila wan tur sha Nongbah ban thied ban pet khamtam ka riam ka beit ialade bad ki tiar ban pynriam iala ki Iing ki sem.
Ka Police Bazaar kaba dei ka Iew die jain, kala shlei da ki nongwan thied ia ka riam ka beit ialade bad ka Longiing baroh kawei.
Hynrei ka Iewduh kala watla ka don bun ki jaka iadie ia thied hynrei ka basa thied tiar pynriam Khristmas kala shlei daki nongwan iew na kylleng ka Jylla kiba kwah ban wan thied iaki tiar pynriam iala ki ing ki sem.
Haba wad bniah iaka dor ki tiar pynriam (decoration) iala ki ing ki sem, ki nongdie kila iathuh baka dor jong uwei u khlur ka dei naduh T. 180 haduh T. 500 katkum ka jingheh.
Ki iathuh ba uwei dieng Christmas (Artificial) u shong dor T. 450 haduh T. 1600 katkum ka jingheh bad ki Lights ka long T.180 haduh 450 katkum jingjrong ki Wire.
Man ka aiom Khristmas ki briew ki ia beh ban thied iaki tiar ban pynriam hala ki ing ki sem hynrei kim ju klet pat ia u syntiew soh Khristmas.Lah ban ong ba une syntiew soh Khristmas, uba rong saw bad ki sla jyrngam udei uba mih tang haka por Khristmas.
Ki katto katne ngut ki longkmie kiba die ia une u jait syntiew kila kam ba une u jait syntiew soh Khristmas u dei uba la shem tang ha Meghalaya. Kila iathuh man u snem, ki ju iatehlok lypa bad ki briew na ka thain Jaintia Hills bad Riwar ban pynoi ia une u jait syntiew.
“Mynta la 10 snem tam nga la shong die syntiew soh Khristmas ha Motphran. Nga ka sakhi wat ki briew na bar Meghalaya bad India ki lyngoh ba ki iohi kum une u jait” la ong kawei ka longkmie.
Kala iathuh ba bun ki briew na bar Meghalaya bad India ki khien ba udei u kynja soh ba long bam namar ba u dei u rong saw.
Ki longkmie ba die ia une u jait syntiew kila kren biria daka ba ong “Tharai kham lah une u syntiew bad ia u dieng Khristmas bad khlem da buh ia une ha ing, ka Khristmas ruh kam pat dei”
Haba kylli iaka dor jong une u jait syntiew, kila iathuh ba ka dor ka long naduh T. 70 ar khum haduh T. 250 saw khum.
Kila iathuh ba ki paidbah ki ia beh bha ia u ba kham duna sla bad kham bun ki soh rong saw bad kila iathuh ba une u syntiew u neh bha lada buh haka Bowl ba don um bad donkam ban kylliang iaka um ruh.
