Shillong, Nohprah 16: Ka Meghalaya kaba la bteng biang ban tied hynne ka sngi kala kamai 320 run bad hap lut ki nongtied, katba ka Manipur ka la kamai 259 run bad hap 8 wiket haka jingiakhun haka sngi ka baar jongka U-19 men’s Cooch Behar Trophy kaba la long ha madan MCA, Polo.
Ka Meghalaya kaba la kamai hynnin ka sngi 264 run bad hap 7 wiket kala bteng ban tied biang hynne ka step bad kala lah ban kamai palat ia ka 300 run ha kaba u Kishlay Vishlux ula kamai 52 run khlem out.
Ka Manipur kaba la leit ban tied kala kamai 259 run bad hap 8 wiket ha kaba u Md Aqeel Ahamed ula kamai 138 run bad ka Manipur ka dang donkam ban kamai sa 61 run ban beh ia ka thong kaba la buh da ka Meghalaya.
U Shavian Blah jong ka Meghalaya ula kawang bol bha ha kaba ula shim 5 wiket katba u Angkit Tamang bad u Charm Marbaniang kila ioh mar 1 wiket.
Ki nongtied ka Manipur kim shym la lah ban kyrda slem, ha kaba ka Manipur kala hap 3 wiket bad kamai tang 9 run bad hadien kane kala hap 4 wiket bad kamai tang 18 run, hynrei u Heishnam Manikanta Singh bad u Ahamed kila ia neh slem hynrei u Heishnam ula out bad ula kamai 31 run.
U Ahamed ula bteng ban tied bha bad ula kamai 138 run lyngba ka jingioh jingkyrshan na ki nongtied kiba kynthup ia u Jordash ubala ioh 40 run bad u Iliyas uba la kamai 26 run.
Ka Meghalaya kan ialeh ban pynhap kloi ia ki nongtied ka Manipur lashai ka sngi khnang ba kan ioh ban tied haka sien ka ba-ar jong katei ka jingiakhun bad ban ialeh ban khur iaka jingjop.
