Shillong, Nohprah 16: Ki Nonghikai Deficit bala shongthait hapoh ka shatri Meghalaya Retired Deficit School Teachers Association (MRDSTA) kila dawa naka Sorkar Jylla ban kyntiew iaka Death-cum-Retirement Gratuity (DCRG) naka T.3.5 lak shaka T.10 lak bad kumjuh ruh ban kyntiew iaka bai bam tymmen jong ki Nonghikai.
Ki nongialam ka MRDSTA kila pyntip ruh kan sa don ka jingialang ha u bnai Lber 2024 ha Garo Hills ban iakren halor kine ki mat jingdawa bad lada ka Sorkar Jylla ka dang sngap mynthi, ki Nonghikai bala shongthait kim banse ban mih sha madan ban iakhih wat hapdeng ka jingnoh rta.
Haba kren sha ki lad pathai khubor u President ka MRDSTA u Bah E. Nongsiang ula iathuh ba naduh 2020 ka seng kala dawa naka Sorkar Jylla ban kyntiew iaka DCRG naka T. 3.5 lak shaka T. 10 lak hynrei haduh mynta ka Sorkar kam pat shim iaki kino kino ki sienjam ban kyntiew iaka DCRG.
U Bah Nongsiang ula iathuh ba ki don kba 3000 ngut ki Nonghikai Deficit bala shongthait hynrei haduh mynta kim pat ioh iaka bai bam tymmen (Pension) watla don napdeng ki Nonghikai kiba la shongthait la palat 20 snem.
“Ka Sorkar Jylla kala kyntiew iaka DCRG hynrei tang naka bynta ki Nonghikai kiba shongthait naduh u snem 2017 haduh 2022 hynrei ngi la dawa naka Sorkar ban kyntiew lang iaka DCRG naka bynta ko Nonghikai kiba shongthait hashuwa 2017 bad hadien 2022” la ong u Bah Nongsiang.
Haba iadei bad ka bai bam (Pension) u Bah Nongsiang ula iathuh baka tnat Pule Puthi kala pynkhreh daka Meghalaya Non Government Deficit Schools and Techers Employees Rule 2023 hynrei haduh mynta ka Sorkar Jylla kam pat ai ka jingmynjur.
“Haba iadei bad kane ngi la kynduh ia u Myntri Rangbah ka Jylla bad ula pyntip ba namar ba ki Nonghikai Deficit ki hap haka Sanction Post, ki don ka hok ban shah kynthup lang ha kane ka Rule 2023” ula ong.
Ula iathuh ba haduh mynta, u Myntri Rangbah ka Jylla u dang shu kular tang daka ktien namar naduh mynta ka Sorkar Jylla kam pat ai ka jingmynjur iaka Meghalaya Non Government Deficit Schools and Techers Employees Rule 2023.
 kila dawa naka Sorkar Jylla ban kyntiew iaka Death-cum-Retirement Gratuity (DCRG) naka T.3.5 lak shaka T.10 lak bad kumjuh ruh ban kyntiew iaka bai bam tymmen jong ki Nonghikai.){kind=link}