Shillong, Nohprah 14 : Kum ka jingithuh ia ka jingtrei ba kot palat ia kaba khmih lynti ha ka State Energy Efficiency Index, ka Jylla Meghalaya kala ioh ia ka second prize ha ka State Energy Efficiency Performance Award (Group 4) jong ka National Energy Conservation Awards (NECA), 2023.
Kane ka jingialang sam khusnam kala long ha Vigyan Bhawan, New Delhi, ha ka jingiadon ryngkat ka President ka Ri India Droukadi Murmu. Kane ka jingioh khusnam ka pyni ia ka jingtreikam ba aiti lut jong ka Sorkar ha kaban tyngkai ia ka bording bad ba nang pyndonkam bha.
Ka NECA ba ju pynlong manla u snem ban rakhe ia ka “National Energy Conservation Day”, ka ai jingithuh ia ka jingtrei ha kaban tyngkai ia ka bording kaba long ha ki kam bapher bapher jong ka ioh ka kot.
Ka National Energy Conservation Day bad ka jingai khusnam ka dei kaba la pynlong da ka Bereau of Energy Efficiency (BEE) hapoh ka Ministry of Power, ka Sorkar India, kaba la pynkupbor kat kum ka Energy Conservation Act, 2001, ban teh kyndon bad pynshlur ia ka jingtyngkai ia ka bording ha India.
Haba pynpaw ia ka jingkmen, u Myntri ka Tnad Bording ka Jylla Abu Taher Mondal ula ong “Ka State Energy Efficiency Performance Award ka phalang ia ka jingkut jingmut jong ngi halor ka jingtyngkai ia ka bording bad ka ai mynsiem ia ngi ban iaid ha ka lynti ban lah pynmih ia ka bording kaba khuid hadien habud”.
U Mondal ula ong ba ka Meghalaya kala lamkhmat ha ka jingpyrshang ban pynmih ia ka bording kaba lah ban neh slem bad dang shen ka Jylla kala pyllait ia ka Solar Mission ba T. 500 klur ban pynthikna ia ka jingpynmih bording na ka thymmei kaba neh shirta hapoh ka Jylla.
La pyntip ruh ba ka Jylla kala pynkhreh ban shna ia artylli ki solar park ha artylli ki jaka kiba lah ban pynmih bording ba mar 20MW. Kine ki dei ha Suchen bad ha Thamar.
