Shillong, Nohprah 14: U Myntri ka Tnad Sports and Youth Affairs Bah Shakliar Warjri ula ong ba ka jingpynkhreh ia ka Meghalaya Games 2024 kala iaid bha shakhmat bad ka sorkar kan pynlut T.23 Klur na ka bynta ban pynlong ia kane ka lympung ialehkai kaba jop ha Tura.
Haba iakren bad ki nongthoh khubor u Bah Shakliar ula ong, ba kin don palat 3000 ngut ki nongialehkai ki ban wan iashimbynta bad wat ki jaka ialehkai ruh ki lah dep ban maramot.
Ula ong ba yn pynlong 22 tylli ki jait jingialehkai ha kane ka lympung bad ka jingthmu ka long ban kyntiew ia ka kam ialehkai khamtam ha ka ban plie lad ia ki samla ba kin sei ia ka sap ka phong ka jongki da ka jingkhmih lynti ba ki nongialehkai kin lah ban lehkai bha ha ki National Level.
U Myntri ula ong, ba ka jingpynlut T.23 klur na ka bynta kane ka jingialehkai ka kynthup kaba shna bad marmot ia ki jaka ialehkai, ki jaka sah, ka bam bad ka leit ka wan bad kiwei kiwei.
Ula ong ba kane ka lympung ialehkai kan sdang ha ka 15 tarik Kyllalyngkot bad kan kut ha ka 20 tarik u Kyllalyngkot 2024.
U Bah Shakliar ula ong, ba ka jingpynlut kane kaba mynta kan long ruh kum ka jingpynkhreh ia ka National Games bad ka sorkar ka ialeh ban pynbiang ia kiei kiei kiba bha tam na ka bynta ki samla.
U Myntri ula pynthikna ruh ba ki nongialehkai kin ym mad jingeh ha kaba iadei bad ki jaka sah bad nalade hi ula wan jurip bunsien na ka bynta ban pynbiang ia ki jingdonkam ki nongialehkai.
Ula ong ba ia ki nongialehkai kiban iashimbynta ha ka Meghalaya Games kin hap ban leh ia ka Medical Test ban peit ba kim dei ban dih ia kino ki jingdih kiba sniew.
Ula ong ruh ba kin don 3 tylli ki jingialehkai tynrai ha katei ka lympung.
