Dei ka ‘multi crore’ racket bala iaid da ki phew snem, ong u Bah Kennedy
Nongpoh, Nohprah 14 : Ka jingkhaii tuh ki Tanker (kali kit umphniang) ia ka petrol/diesel ha shiteng lynti kata ha surok NH-6, Ri-Bhoi District, kala paw mynta ba ka dei ka ‘multi crore’ racket (kam tuh ba da ki phew phew klur) bad kaba la iaid da ki phew phew snem bad kane ka kam be-ain kala paw pyrthei da ka jingkhynra naphang ka Tnad Meghalaya Police ban pynduhjait ia kane ka kam bymman dang shen.
Kat kum ka jingai jingkhein u President ka Petroleum Association of Meghalaya Bah Kennedy Khyriem, ula ong ba ka jing khaii tuh jong ki Tanker ia ka petrol/diesel ha surok NH-6, Ri-Bhoi District, kala kot haduh T.27 klur shisnem.
“Kane ka kam bymman ka dei kaba la iaid da ki phew phew snem bad ka dei ka jyrsieh ba kot da ki phew phew klur shisnem” ula ong.
Haba ai jingkhein, u Bah Kennedy ula iathuh ba ki don ym duna ia 400 tylli ki tanker kit umphniang ba iaid manla ka sngi na surok bah NH-6 kata naduh Jorabat ban pynpoi umphniang sha Ri-lum Khasi Jaintia nangta sha Tripura, Silchar, Mizoram, Karimganj, Hailakandi bad kiwei ki Jylla ba marjan.
U ong ba ka jingtuh ia ka umphniang (petrol/diesel) ka long da ka 100 liter kawei ka kali bad lada ki nongtuh umphniang ki tuh tang 25 % na ki tanker, ka mut 100 na ka 400 tylli ki kali ha ka shisngi, haduh 10000 liter ka umphniang ka jah ha ka shisngi. Ula ong ba ka dor jong ka petrol ka long T.98 bad ka diesel ka long T. 87 hynrei haba khein kyllum lang bad buhpdeng ia ka T. 90 shi liter, ka pisa, ka pisa baroh lang kala kot haduh T. 9 lak shisngi.
U ong “Lada ngi khein tang 300 sngi ha ka shisnem, ka pisa ba ioh lum naka jingdie tuh ia ka umphniang (petrol/diesel) ka kot sha ka T. 27 klur”.
“Ki paidbah kim tip satia ia kane ka jingshah tuh ka umphniang bad kala pynduhnong bha ym tang ia ngi hynrei kala ktah ia u paidbah salonsar uba pyndonkam ia ka umphniang” ula bynrap.
U Bah Kennedy u pynpaw ba dei halor kane ka kam bymman, ba ki trai petrol pump kila ieng ban iakhun ia ka hok bad ban dawa iala ka hok lajong da kaba kyntu ia ki bor ka ain ba kan leh eiei mardor.
Ha kajuh ka por, u Bah Kennedy ula ai ka jingiaroh ia ka Tnad Pulit kaba la pynlong ia ka jingkhynra ha ki 7 tylli ki jaka myn ha ka 24 tarik Naiwieng 2023, bad iohkem haduh 4 ngut ki nongniah jong ki kali tanker ha ka por ba dang khaii tuh, kurup ia ki tanker, kurup ia ka umphniang bad ter ter.
U Bah Kennedy ula ong ba kane ka dei ka kam kaba hap ban ratdyngkhong haba buh ka jingkyntu ia ki Shnong ba don ha shilynter ka surok NH-6 lem bad ki kynhun peitngor ha ka imlang sahlang, ba kim dei shuh ban ailad ia ki kam khaii tuh ia ka umphniang hapoh kane ka surok khnang ba kan duh kan dam noh kane ka kam bymman.
