Shillong Nohprah 13: U Myntri Rangbah ka jylla u Conrad K Sangma hynne ka sngi Balang, ula ong ba ka sorkar jylla ka dang khmih bniah ia ka jingtyrwa ban pynkha ia ki Police Station kiba thymmai hynrei ka thong jong ka sorkar mynta ka long ban pynkhlain shwa ia ki Police Station kiba la don lypa.
Haba iakren bad ki nongthoh khubor ha kaba iadei abd ka jingdawa ban buh ia ka Police Station ha Upper Shillong, u Conrad Sangma ula ong, “Ngi dang khmih bniah ha baroh ki liang bad ki don bun ki jingdawa ban buh ia ki Police Station ha kylleng ka jylla hynrei ha ka jingsngew ka jong nga, ng idei ban pynkhlain shwa bad ban pynlong ia ki Police Station bad kiwei kiwei kiba la don lypa ba kin treikam pura 100 na ka 100 bad hadien kane, ngin sa khmih ia kaban iaid shakhmat”.
“Phi lah ban iohi ba ngi don kumba 2000 tylli ki kam kiba ngi hap ban thung ha ki kyrdan bapher ha ki police station bad outpost ha kylleng ki bynta jong ka jylla bad ka thong kaba hakhmat ka jong nga ka long ban pyndep shwa ia katei” ula ong.
U Myntri Rangbah ula ong, “Ka thong kaba hakhmat ka long ban pynthikna ba kin don bun ngut ki nongtrei, ki tiar ki tar, ki kali, ki tiar siat bad kajingai jinghikai bad baroh ki jingdonkam kiba la don lypa kidei ban treikam pura 100 na ka 100 bad hadien kane, ngin sa peit kumno ban pynkhlain shuh shuh bad ban pyniar ia ki police station.”
Ula pynthikna da kaba ong, “Hooid, (ka jingthaw ia ki police station kiba thymmai) ka don hapoh ka jingkhmih bniah bha hynrei ia mynta ngin iaid shwa da ka pali baroh”.
