Shillong, Nohprah 11 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ha ka sngi Nyngkong, ula pyniaid ia ka jingialang kaba iamir jingmut halor ki lad ki lynti ban lah pynbun noh ia ki surok ha Shillong bad ha New Shillong Township (NST).
Haba iakren bad ki nongthoh khubor, u Bah Prestone ula ong “Nga la shong jingialang ba iadei bad ka Nongbah Shillong bad ka New Shillong Township ha kaba ngi la don jingthmu ban pynjanai ia ki lad pyniasoh ban lait na ka jingkhapngiah, la ka dei ka Central Division PWD, ka By-pass PWD bad ka National Highway Division”.
“Nga la khot ia ka jingialang bad kine ki lai tylli ki Division nalor ka Tnad Finance bad Tnad Forest. Ngi la iakren ia kine ki ishu ha ryngkat ka DC ha kaba ngi la pyrshang ban wad ia ka lynti ban mait ia ki surok khnang ba ngin lah ban weng syndon ia ka jingkhapngiah” ula bynrap.
Haba kylli, u Bah Prestone ula ong ba ia ka NST, ka Sorkar kala tyrwa ia katto katne ki bynta ban pynkylla surok 4 lane bad ruh “Ngi la pyrshang ban pynthikna ba ngin pynbun ia ki surok ba pyniasoh ia ki National Highway la ka dei ka Shillong Bypass lane ka Shillong-Jowai National Highway-Ngin pynbun ia ki lad pyniasoh ha Nongbah Shillong bad NST”.
U Bah Prestone u pyntip ba ka Sorkar Jylla kala pan ia ka jingkyrshan jong ka Sorkar Pdeng ban pyntreikam ia kine ki project.
U Bah Prestone u ong ba ka jingkylli ban pynkylla surok 4 lane ia ka surok Shillong barim kam mih satia. “Hynrei kaba kaba ngi kwah ka long ba lehse ngi lah ban pynkylla haduh ka Intermediate Lane bad nga tharai kane kala biang palat” ula bynrap.
Pule lang ia kane: ‘Wat leh Politics’ : Ong u DyCM ia ka VPP halor ka kam them Metor
