Shillong, Nohprah 10: Ka Meghalaya kala pynliem ia ka Arunachal Pradesh da 76 run bad khlem da donkam tied biang ha ka sien ka baar ne Second Innings, ha ka sngi Balai jong ka jingiakhun ia ka U-19 Men’s Cooch Behar Trophy kaba la long hynne ka sngi u Blei ha Anand, Gujarat.
Ha kane ka jingiakhun, ka Arunachal kala leit ban tied nyngkong ha kaba kala kamai 160 run bad hap lut ki wiket bad haba ka Meghalaya kala leitban tied kala kamai 365 run bad hap lut ki wiket bad kala tam da 205 run ia ka Arunachal.
Ka Arunachal kala leit ban tied biang bad ka jingialehkai bha ki nongialehkai ka Meghalaya kila lah ban pynrem iaka Arunachal kaba la kamai tang 129 run bad hap lut ki nongtied haka jingleit tied ka baar sien bad ka Meghalaya kala jop da 76 run bad khlem da donkam ban tied biang.
U Avinash Rai jong ka Meghalaya ula kamai 126 run katba u Angkit Tamang ula kawang bol bha da kaba shim 4.
Nalor kane, hynne ka sngi u Shavian Blah ula shim 3 wiket, katba haka wat kaba nyngkong ula shim 3 wiket bad ula tied bha ruh da kaba kamai 74 run.
U Kishlay Vishlux ula shim 2 wiket bad Balgrik Sangma ula ioh 1 wiket,ha ka jingleit kawang bol, katba u Angkit bad u Balgrik ha ka wat kaba nyngkong bad baar kila ioh ban khur mar 5 wiket.
Kum ban shu pynkynmaw ka Meghalaya kala iakhun 4 sien, ha kaba kala iakhiad nyngkong eh bad ka Mizoram, hadien kane kala shah pynrem ha ka Nagaland bad mynta kala jop ar sien da kaba pynrem ia ka Sikkim bad ia ka Arunachal.
Ka Meghalaya mynta kan wanphai noh sha iing, ban pynkhreh ban iakhun pyrshah ia ka Manipur kaban dei syndon ka jingiakhun kaba khatduh jong ka lympung ialehkai kaban sdang naduh ka 15 tarik u Nohprah ha nongbah Shillong.
