Shillong, Nohprah 08 : Ka Myntri ka Koit ka Khiah Kong Ampareen Lyngdoh ha ka sngi Thohdieng kala ong ba ka jing thungkam iaki doktor specialist ka dang long kaba eh bha ia ka Jylla Meghalaya.
Haba iakren bad ki nongthoh khubor, ka Kong Ampareen kala ong ba ka jingduna ka dang bun bha haba phai sha ka jingdon ki doktor specialist bad ka jingdonkam ia ki doktor specialist.
“Kumta, ka Sorkar Meghalaya kala wanrah ia ka sienjam da kaba phah ia ki doktor bala don lypa ba kin leit da ki certified programme khnang ba kin wan phai biang sha Jylla tang ha ka por ba lyngkot bad ban leit biang sha ki hospital ban ai ka jingshakri” kala ong.
Kat kum ka jingong jong ka, haduh mynta ka Sorkar Meghalaya kala shim ia ka sienjam kaba biang bha bad kaba seisoh ban lah pyndap ia kane ka jingduna ki doktor specialist.
Haba ong ia kane, ka Myntri kala pynpaw pat ba ka Sorkar ka hap ban khmih biang ha kaban ai kham bun ki jingmyntoi ia ki doktor specialist ba kin wan trei hapoh ka Jylla Meghalaya wat hapdeng baroh ki jingeh khnang ba ngin lah ban shakri ia ki nongshongshnong bad ai ki jingsumar kiba paka.
