Shillong, Nohprah 08 : Haduh 7 tylli ki Sengbhalang ka thain Sohra, kila dawa ia ka seng Hynniewtrep National Youth Movement (HNYM) ba kan pynshai halor ka jingkynnoh ba don kiba leh benami hapoh ka Land Custom Station (LCS) ha Majai.
Kine ki Sengbhalang ki kynthup ia ka FKJGP- Riwar Zone, UHM Riwar Sepngi, ka CRYF, FKJGP Sohra, HANM South East Sohra, HNYF South East Sohra, bad ka HYC Riwar Zone.
Haba kren sha ki lad pathai khubor u Working President ka FKJGP Sohra Circle Bah Corlos Kharmih ula ong ba dang shen ka seng HNYM kala kynnoh baka Hima Sohra bad ki sengbhalang naka thain Sohra ki donkti ban leh benami bad ban leh khlieh daka ba khanglad iaki trai ri trai muluk ban trei ia haka kam khaii mawshun lyngba ka LCS Majai.
U Bah Corlos ula ong ba kane ka jingkynnoh ka seng HNYM ka dei ka ba ktah mationg ym tang iaka Hima Sohra bad iaki Sengbhalang hynrei wat ia ki trai shnong jong kane ka thain.
“Ngi pynshai ba ngi wan hangne ym ban tuklar halor ka jingioh bhah ne duh bhah ki para doh ia ka kamai ka jih ha Majai hynrei ka jingwan jong ngi ka long ban pynshai halor ka jingktah mationg ka HNYM ia ka dong ka thain jong ngi” ong u Bah Corlos.
U Bah Corlos ula ong ba kane ka jingkynnoh ka HNYM ka pyni ba kane ka seng ka leh shilliang ha ba ka kdew kti tang ia ka Land Custom Station ha Majai halor ka jinglait ka khajna ka jylla namar ka Meghalaya ka don kumba 8-9 tylli ki LCS.
Ula ong ba ka jingduh bylla ki 30 ngut ki para Khasi na ka Hima Sohra ka dei beit namar ba kim pat biang iaki kot ki sla ba donkam bad kam dei satia namar ka jingmushlia ki sengbhalang ne ka Hima.
Ula iathuh ba ki sengbhalang hadien ba ioh jingtip ba don ki Khasi kiba duh bylla, kila wad bniah bad la shem ba ki khlem pat pynbiang iaki kot ki sla bad ki nongpyniaid kila ai por biang ban pynbiang ia ki kot ki sla kumba long ka riti trei kam ha katei ka jaka.
