Nongpoh, Nohprah 05: Ka Block Mission Coordinator Office, SSA, SEMAM, ka Umling C&RD Block hynne ka sngi Ba-ar, kala rakhe ia ka sngi kyrpang jong ki briew ba don ki jingduna ha ki bor met bor phat, kaba la tip kum ka International Disability Day.
Ia kane ka jingrakhe la pynlong ha phyllaw jong ka Dorbar Hall, Nongpoh bad la pynshongkun ia ka da ka jingiadon ryngkat u MLA ka Nongpoh Bah Mayralborn Syiem kum u Kongsan, u ADC ka Ri-Bhoi Raja Brahma bad kiwei kiwei.
Ha kane ka sngi, ka BMC ka SSA, SEMAM, kala pynlong ruh ia ka prokram khmih bniah ia ka koit ka khiah jong ki nongiashimbynta ha kane ka jingrakhe (Free Medical Check-up) bad ruh ka jingpynbyrngia ia ki heprit kiba la wan shimbynta na kylleng ki shnong kiba hap hapoh ka jingpeit jingkhmieh jong ka Umling C&RD Block.
Haba kren kum u kongsan, u Bah Mayral Born Syiem, u la ai ia ka jingiaroh ia ka tnad jong ka BMC, ka SSA, SEMAM ka Umling C&RD Block kiba la shim ia ka bynta kaba khraw ban kynmaw burom lem ia ki para nongshong shnong, ki bahaiing bahasem ki paradoh parasnam kiba don hapdeng ka jingduna ki dkhot met lane kiba la ju tip kum kita ki Differently Able person kiba don la ka bynta hapoh ka imlang ka sahlang ia kiba ngim dei ban leh klet ne leh shilliang namar ka jinglong jong ki ha ki dkhot met ne bor pyrkhat pyrdain.
