Shillong, Nohprah 04 : Ka Tnad Meghalaya Police kala pynmih ia ka jingbthah ba la khang ban niah kali ha ki jaka paidbah ia ki khynnah ba hapoh 18 snem bad lada shem, ki Kmie Kpa kin ngat ha ka jingpynsajia da ka jingshong along haduh 3 snem bad ka kuna ba T. 25,000.
Kat kum kane ka jingbthah (Advisory), la ong ba kane ka long kat kum ka kyndon 199 A jong ka MotorVehicle Act.
Dang shen uwei u khynnah niah thuk thuk, ula rat ia kawei ka Longkmie ha Mawlai haduh ba kane ka Longkmie kala khlad noh na kane ka pyrthei. Ka jingbishar ia kane ka case ka dang iaid shakhmat.
Ka jingbthah kala khang pyrshah ruh ban pynlong ia ka jingiakop niah sted ia ki kali/arshaka ha ki surok paidbah lait noh tang kiba la ai jingbit da ka Sorkar.
Namar ka jingbun ki nongniah kali hapdeng ka jingbuaid kyiad, kaba lam bunsien sha ka jingjia aksiden kiba shim ruh ia ki mynsiem briew, ka Tnad Pulit kala bthah ba ka jingniah kali ynda la buaid palat ia u pud bala buh, kin ngat ha ka jingshah dain kun aba kot T. 10,000 lane ka jingshong along haduh 6 bnai.
La mana pyrshah ruh ban pynkylla ia ki tiar kali (alteration) khlem da ioh jingbit na ki bor ba dei khmih bad la ong ba kiba ialeh pyrshah kin ngat ha ka jingpynsajia kat kum ka Motor Vehicle Act da ka jingshong along haduh 6 bnai lane bad ka kun aba T. 5000.
Ki bym deng ia ki seat belt kin ngat ha ka kuna ba T. 1000 bad kiba kren phone ha ka por ba niah kali kin ngat ha ka kuna ba T. 5000.
Ka Tnad MLP kala pyntip ruh ba ka Motor Vehicle Act ka pynsajia ia kiba pynieng kali khlemakor harud surok, knieh tam jubor shakhmat ia kiwei ki kali, niah kali khlem akor, jingdih sikret, ka jingkren tohmet ia ki passenger, kit palat pud ia ki passenger, shim tam ia ka bai kali, ban pynieng kali hapdeng surok bad kiwei kiwei.
