Guwahati, Nohprah 02: Ka kynhun ki Pulit bad ka Tnad Forest ha ka sngi Palei, kila kem ia uwei u briew uba donkti ban pyniap ia kawei ka rhino kynthei da u sum ha ka por ba kane ka mrad ka mih na Kaziranga National Park bad Tiger Reserve.
Une u briew u dei uba la tip kyrteng u Naren Saikia, uba dei na ka shnong Lokhorakhonia.
Kat kum ka khubor, u Naren ula kawang da u sum ia kane ka rhino kaba mih ban iaid lynti hapoh ka thain.
Ia u Saikia la rah ban tian bishar ha Iingkashari, kaba la hukum ban set ia u haduh 14 sngi hapoh ka Judicial custody.
Ka jingiaid swait da ki drone ryngkat ka kynhun iaid pahara da ki hati jong ki Nongtrei ka Tnad Khlaw bala ialam da u Forest Ranger Dr Bibhuti Ranjan Gagoi, kala lap ia ka met jong kane ka rhina ha ka 30 tarik Naiwieng por 2:30 baje janmiet marjan ka thain Teteliguri Ant Poaching Camp, kaba don hapoh ka National Park.
Hadien ka jinglum jingtip kaba bniah da u DFO ka Eastern Assam Wildlife Division Arun Vignesh bad ka kynhun, la kem noh ia u Naren Saikia.
Kat kum ka khana samari, ka jingdon ki rhina haduh u snem 2022 ha Kaziranga National Park ka kot sha ka 2613 tylli.
