Shillong, Nohprah 01: Ka ophis jong ka Deputy Commissioner , East Khasi Hills District kum shi bynta jong ka Catch the Rain Campaign 2023 kala pynlong ia ka Water Heritage Fortnight hynne ka sngi Thohdieng ha Ward’s Lake, Shillong.
Ka jingthmu jong kane ka jingialang ka long ban pynleit jingmut ha kaba iadei bad ki tyllong um bad ki um ki wah bad ban pynsngewthuh ia ki paidbah ia ka jingkongsan ban pynneh pynsah bad ban iada ia kine ki um ki wah bad ban shim ia ka jinglongtrai kum ki nongshong shnong bad hakajuh ka por ban kyntiew ia ka kam jngohkai bad ban pynneh pynsah ia ki jaka kiba rim khatam ia kito kiba la shu ieh beit kumto.
Ha kaba iadei bad kane ka bynta ban pynneh pynsah ia ka jingdon jingem kyrhai ia ki um ki wah, ka Ministry of Jal Shakti kala dep ban ithuh ia ki 75 tylli ki jingtei kum ki “Water Heritage Structure” kum shi bynta jong ka jingrakhe ia ka Azadi Ka Amrit Mahotsava.
Ka Ward’s Lake kadei kawei na ki jingtei kaba la pyndep ia baroh ki jingdonkam kiba la buh da ka Selection Committee hapoh jong ka Ministry of Jal Shakti.
Kitei ki kyndon ki kynthup ba ka jingtei kadei ban long palat 100 snem bad kadei ban dei ka jingtei kaba la tei hi da ki briew ne Engineer bad kam dei ban dei kaba la shu long hi (natural).
Ka jingtei kadei ban don ia ka jingbatai ia ka rukom pyndonkam ia ka, ka jingkordor ka jong ki yn sa pynshong nongrim la ki hap ha ka kyrdan District, State ne National Level Heritage katkum ka jingshem ha ka jingwad bniah bad ki kyndon kiba la buh, ka jingtreikam bad ka jinglong jingman bad kiwei kiwei.
Ka Ward’s Lake kala pyndep lut ia kitei ki kyndon bad kumta ka long kaba donkam ban pynsngewthuh bad ban pynshlur ia baroh kiba donbynta bad ia ka imlang sahlang shaphang ka jingkongsan bad jingdonkam ban iada, pynneh pynsah bad ban kyntiew ia ki um ki wah.
